Annus
2 0 0 6


Cur heres regum Italiae in vincula coniectus sit

Cur heres regum Italiae in vincula coniectus sit

Martis die in carcere Potentiae, oppidi Italiae meridionalis, interrogabitur Victorius Emmanuel Sabaudiae (quem in imagine aspicis) filius Humberti II, ultimi Italiae regis.

Nam anno MCMXLVI cives Italici (primum etiam mulieres) suffragio habito principatum Sabaudiae desinere decrevit, regiminis fascistici scelerum tolerantem, rem publicam constitui et regem Humbertum II - per singulum mensem regnum occupantem, qua re "regem Maium" appellatum - in exsilium expelli: qui cum viris familiae suae in patriam redire lege suprema post biennium comprobata aperte vetitus est. Anno tamen bismillesimo et secundo ambo senatus rei publicae legem supremam ita commutaverunt, ut principi aetate provecto eiusque filio Emmanuel Philiberto maiorum solum ut rei publicae cives attingere liceret.

Veneris die inopinati nuntii de Sabaudorum herede undeseptuagenario per totam Italiam divulgati sunt: nam iudex tribunalis Potentini Albertus Iannuzzi, requirentis magistratus Henry John Woodcock propositis assensus, in vico lacustri apud Leucum, oppidum Langobardum, Victorium Sabaudiae comprehendi et in vincula Potentiae conici iussit. Accusatur reus cum duodecim pariter captis, quod facultates ad aleas electronicas populo praebendas illicite, adiuvantibus nonnullis scelestis Siculis, venum data sint et quod meretrices ad clientes domus aleariae Campilyei (Campione d'Italia) delectandos comparatae sint.

Inter alios captivos etiam praefectus vici Campilyei (Campione d'Italia), nuntius ministri rebus exteris addicti praeteriti Italici regiminis et Simeon II, consobrinus Victorii, olim minister primarius Bulgariae numerantur.

Scripsit Herimannus Novocomensis



Retro ad:

Novissima editio
Summum paginae