De foro sociali Europaeo Athenis habito

Nonis Maiis Athenis finem habuit Forum Sociale Europaeum, id est conventus Europae civium qui, sicut Forum Sociale Mundanum, de mundo radicitus renovando quotannis disputant, facta et cogitationes ad hoc usquequaque tentata referentes. Triginta milia hominum convenisse narrantur, plerumque a Graecia, Francogallia et Italia, neque afuerunt iuvenes ab Europa Orientali olim communistica.

De "nova Europa" saepissime in ducentis conventibus ibi habitis disceptatum est: inde duo scripta publicata sunt, alterum, "charta iuris socialis" appellatum, fundamenta communia iuris civium demonstrat, alterum vero bellis finem imponi et ratione omnes dissensiones componi postulat, magna cum sollicitudine oppositionem patefaciens ob poenas quibus USA aliaeque civitates Occidentales rem publicam Persarum afficere moliuntur.

Die Solis deliberatum est quarta septimana mensis Septembris pacifice per totam Europam reclamatum iri, ut exterae copiae ex Iraquia et Afganistania domum revocentur, nullus impetus in Persidem fiat, populus Palaestinus in discrimine auxiliis sustineatur, stationes ab USA per totum orbem constitutae amoveantur, denique omnia arma nuclearia aboleantur.

Scripsit Herimannus Novocomensis