Annus
2 0 0 6


Macau -

Macau - Mecca nova aleatorum

Lucrum annuale domuum aleatoriarum civitatis insularis Macau (quae usque ad annum 1998 sub dicione Lusitanorum manserat) crevit anno 2005 gradu 10% et attigit 5.5 miliarda dollariorum USA - nuntiavit sedes statistica huius regionis autonomae Sinarum. Si simile incrementum etiam 2006 anno iterabitur, Macau palmam capitis mundi aleatorum ab urbe Las Vegas arripiet, quae urbs Americana in memoria viventium semper paradisus ludorum chartaceorum ac iis similium videri solebat. Quod verisimiliter non plus fiet, nam rerum fiscalium periti excpectant fructum ex abacis Macauensium productum bis crescendum proximis 3-4 annis.

Lucrum autem ultimi anni omnium domuum aleatoriarum Las Vegas se aequavit 6 mld USD, plus minusve sicut in praeteritis annis - non crescit scilicet quaestus, non decrescit, idem manet. Item quidem in aliis urbibus aleae omnino deditis Americae (Atlantic City) necnon Europae (Monte Carlo). Interdum rem aleatoriam homines novi intrant - viri locupletes Sinenses. Qui certe nolunt iter transcontinentale suscipere semper, cum voluntas aleis ludere eos capiat, malunt in proximum locum proficisci, ubi pecunaim ludendo aquiescere aut (saepius) perdere iuxta legem liceat. Qui locus est Macau, ubi Lusitani - aliter quam Britanni in vicina Hongkongia, ne dicam communisticum regimen Sinarum - speluncas ludi chartacei publice tenere sinabant. Post annum 1998 regimen Pekingense hanc licentiam insulanis retinuit, ne violator libertatis zonae autonomae videretur.

Palmam novae "Meccae aleatoriae" mundi Macau sit arreptura sola ratione demographica: in radio 5 horarum volatu aeronavis circa urbem Las Vegas descripto 450 miliones habitatorum invenies, circa Macau autem in simili radio 3 miliarda. Quorum nonnulli citissime ad magnas opes procedunt...

 

Scripsit Nanompouphos



Retro ad:

Novissima editio
Summum paginae