Annus
2 0 0 6


22

De Boliviae vapore naturali et petroleo in rei publicae manus redituris

Praeses Boliviae Evus Morales iussit societati tantum a re publica Boliviana institutae omnem vaporis naturalis et petrolei mercaturam committi, quae alienigenis vendere abhinc non licebit: ipse per televisionem sollemniter nuntiavit rapinam bonorum illorum, quibus rerum natura Boliviam tam copiose donavit, denique finem habuisse. Societatibus externis spatium temporis sex mensium conceditur, ut novas condiciones cum re publica paciscantur aut Boliviam deserant.

Evus Morales, antequam praesidens creatus esset, pro certo affirmavit patriam suam dominam iterum bonorum naturalium fore, praesertim vaporis naturalis, cuius maxima copia sub terra iacet: ideo exercitus fabri campos petroleo vaporique producendo dicatos occupare iussi sunt.

Braziliana Petrobras, Hispanica et Argentina Repsol YPF, Britannicae British Gas et British Petroleum, Francogallica Total maximae sunt societates, quae consilio praesidis Boliviae gravissime afficientur. Quas omnes reputant moderatoribus Boliviae summa ope resistere in animo habere.

Scripsit Herimannus Novocomensis



Retro ad:

Novissima editio
Summum paginae