Annus
2 0 0 6


dllll

d.30. m.Oct. a.2005

SERIES BOMBARUM

Ab Indis celebrari heroem Delhianum

Kuldeep Singh mox suspicatus est, qualem fascem transportaret. Itaque idem auriga laophori curavit, ut epibatae quam celerrimê e laophoro escenderent. Deinde bomba est displosa, nunc Singh de vitâ suâ luctatur. Interim grex tromocratarum usque nunc ignotus confessus est se esse auctorem trium attentationum horribilium die Saturni Neodelhiâ in urbe factarum.

Neo-Delhiâ ex urbe – India celebrat heroem tragicum: Admirabili animi sui praesentiâ auriga laophori (i.e. Angl. bus driver) nomine Kuldeep Singh servavit vitas plus triginta hominum laophoro suo vehentium. Idem vir gubernavit laophorum, in quo displosa est una ex tribus bombis, quibus die Saturni percussum est Neo-Delhia urbs Indiae capitalis. Aliqui epibata ei monstraverat fascem quendam colligatum. Idem postea diurnariis folii „Times of India" rettulit aurigam, cum nemo dixisset se fascis esse possessorem, statim suspicatum esse eidem inesse bombam.


In tribu Sarojini Nagar quantae destructiones factae sint: Astyphylaces quaerunt vestigia.

Singh laophorum constitit in locis aliquatenus remotis, curavit, ut omnes vectores escenderent et conatus est bombam e fenestrâ proicere. At eo momento temporis bomba displosa est. Singh affectus est vulneribus gravissimis; hôc tempore luctatur de vitâ suâ. Nonnulli vectores leviter laesi sunt. At contra ac aliis bombarum displosionibus hac nullus laophori epibata est interfectus.

Interim astynomi ediderunt imaginem viri, qui attentator esse putatur (quae imago confecta est secundum descriptiones testium). Idem vir, qui est facie asiaticâ, dicitur in mercatu Sarojini Nager, ubi plerique homines interfecti sunt, iuxta lagoenam gasicam deposuisse vaporariam ollam coctoriam, cui inesset bomba.

Die Solis grex usque nunc ignotus confessus est se esse auctorem trium attentationum bombicarum. Ahmed Yar Gaznavi, locutor huius gregis, qui ipse se appellat inquilab (i.e. revolutio), Srinagar in urbe, quod est caput Casmiriae Indicae, dixit compluribus diurnariis gregem tam diu perrecturum esse tales attentationes facere, dum Indiae gubernatores milites suos e Casmiriâ reciperent ibique desisterent ab „actionibus inhumanis".

Diurnarii stationum televisificarum rettulerunt gregem Inquilab esse partem bellicosae organisationis pro-pacistanianae, cui nomen esset Lashkar-e-Taiba. At quidam locutor astynomicus dixit astynomos talem organisationem ignorare. In regione limitaneâ inter Pacistaniam et Indiam sitâ ex anno 1989 decuria ferê organisationum seditiosarum pugnat contra milites Indos.

Attentationibus die Saturni factis plus 60 homines interfecti esse recentissimê nuntiati sunt. Gubernatores Delhienses rettulerunt 188 minimum homines esse laesos.

Maturo espere (temporis localis) primâ displosione percussus est mercatus mediae Neo-Delhiae frequentatissimus, ubi multi homines dona emebant ad Hinduorum sollemnitatem Diwali celebrandam. Locutor siphonariorum dixit complures homines interfectos esse, astynomi rettulerunt multos esse vulneratos. Prope mercatum in tribu Paharganj sunt nonnulla deversoria vilia, quae etiam adhibentur a periegetis peregrinis sacciperia dorsualia baiulantibus. Astynomi hanc tribum obstruxerunt.


Astynomi prope locum attentationis versantes: Status Neo-Delhiae extraordinarius

Paucis minutis postea altera displosio facta est prope mercatum in tribu australi Sarojini Nagar. Ibi interfecti esse minimum 39 homines a Shivraj Patil ministro rerum internarum dicti sunt.

 

Tertiâ displosione in tribu Govindpuri percussum est laophorum illius Kuldeep Singh. Qua complures homines praetereuntes necati esse a Jagtar Singh locutore siphonariorum dicti sunt. Astynomi curaverunt, ut omnes mercatûs clauderentur. Patil minister rerum internarum in emissione televisoriâ: „Rogo vos," inquit „ut domum eatis ad familias vestras". Manmohan Singh minister praesidens cives admonuit, ne sollicitarentur.

 

Singh dixit istanc seriem displosionum Neo-Delhiensem effectam esse a "tromocratis". Singh: "Gubernantes" inquit „paratissimi sunt omnes tromocratas repugnare quam efficacissimê". Indiam violentiâ minimê inhiberi, ne impugnaret „tromocratas". Attentationibus afflictos esse cives innocentes.


Pacistani autem, Indorum propinqui et rivales, attentationes in terrâ propinquâ factas acriter condemnaverunt. Minister rerum externarum Islamabadensis: "Impetus" inquit

„in mercatum frequentatissimum factus est actus tromocraticus. Populus Pacistanianus eiusque gubernatores hôc facinore barbarico consternati sunt". Gubernatores Pacistaniae sperare nocentes quam maturrimê punitum iri.

 

Die Martis in Indiâ celebrabitur Diwali – sollemnitas luminum - , qui est dies festus Hinduorum unus ex dilectissimis. Die Veneris muslimi celebrant Eid, i.e. finem ipsius Ramadan, mensis ieiunii. Die Saturni ante Diwali et Eid ultimo aliquot decem milia hominum versati erant Neo-Delhiâ in urbe (ubi habitant 14 miliones), ut dona emerent.


Hanc relationem d. 30. m.Oct. a.2005 in periodico „Der Spiegel" inventam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: ///www.leolatinus.com/

Scripsit Nicolaus Gross



Retro ad:

Novissima editio
Summum paginae