Grex Latine Loquentium

Latinitatis Recentioris Exempla

Ronald A. Knox

Epistula Ulixis ad Penelopam

anno 1921 composita


Dionysius Silvanus Humberto et sodalibus s.p.d.

Dum res velocissime in Afghanistania mutantur seque in montibus iam occultant latrunculi, in carmine aliquid Ovidiano delector ab Oxoniensi eruditissimo Ronald A. Knox (1888-1957) anno 1921 composito. Epistula est Ulixis ad Penelopam... in equo illo Troiano scripta:

 

                Vlixes Penelopae

Hanc tibi Troiano chartam de litore mitto:
      machina me belli sutilis, uxor, habet.
Quod prave scribo, quod linea saepius errat,
      urgebat cubitus Demophoonta meus:
neve atramentum timeas de sanguine factum,
      hunc laticem illius, non mea, crura dabant.
Scilicet in magno (nuper fabricavit Epeus
      intexens costas ilice) condor equo:
corpora lecta virum sortiti immisimus illuc;
      lecta utinam minus his corpora dura forent!
Haud secus angustae conferti in finibus ollae
      Sardinii pisces, squamea turba, latent.
Titillat nasum misero mihi crista Thoantis,
      Thessandri pungit tota pharetra latus:
hinc illinc mediam volverunt Troes in urbem;
      pessimus, heu, semper (scis bene) nauta fui;
nunc etiam missis tentant hastilibus alvum:
      haesura in bracis iam puto iamque meis!
Penelope, valeas; hinc me si fata benigna
      protulerint, ibo tempus in omne pedes.

 

[NB In finibus ollae Sardinii pisces: haec aperte iocatur Knox, nam Anglice dicitur "Packed in like sardines in a tin"!]

Valete.

Die XVI mens. Novembris anno MMI p.Chr.n.

 


Retro

Index

Quid sit Grex

Pinacotheca

Exempla

Subnotare

Regula

Utilia