SANCTUS
Sanctus Antonius Abbas
 Sanctus Antonius abbas
Saeculo tertio p.C.n. vergente et quarto incipiente novae
rationes sanctitatis a Christianis inventae sunt, quorum
persecutiones ob crescentem Ecclesiae auctoritatem in annos
rariores fiebant. Sanctus Athanasius Alexandriae episcopus nobis
pretiosam narrationem vitae magistri sui Antonii abbatis
reliquit.
Agricolarum familia Comae in oppido Aegyptio anno CCL ortus,
Antonius adulescens parentibus orbatus noluit villam agros bona
sua cum sorore administrare, omnia vendidit, sororem virginum
coenobio commisit et in solitudines Thebaidis confugit. Canistra
intexere et venum dare solitus erat, ut sibi victum compararet et
inopibus necessaria suppeditaret. Post aliquot annos vehementibus
temptationibus et libidinis et ventris probatus est: nemo
Christianorum enim eius modo de omnibus bonis decesserat Deum
tantum requirens. Ut temptationes vinceret, anachoretae qui prope
illum vivebant eum ad severiorem vitam exhortati sunt: panno
tantum indutus sepulchrum in colle inhabitare coepit, herbis et
fructibus silvestribus et pane interdum ab amico donato tantum
vescens. Ubi non modo temptationes sed etiam somnia et clamores
Antonium excruciaverunt, qui tamen firmus in Dei fide permanere
perrexit.
Inde, ne incolae curiosi quietem turbarent, ad Sinum Arabicum
migravit et in arce derelicta colubris infesta per annos viginti
vitam egit: cui bis quotannis panis canistro deferebatur. Turbae
vitam eiusmodi cognoscere cupientes Antonium visitaverunt: qui
docere quapropter et consulere coepit et duo coenobia condidit.
Anno CCCXI, tempore imperatoris Maximin Daiae persecutionum,
Alexandriam rediit fratrum fidem confirmaturus; eo saepe posthac
se contulit, ut discipulo suo Athanasio episcopo auxilium ferret.
Postquam pax Ecclesiae restituta est, in solitudinibus Thebaidis
hortusculum colens vitam egit, usque ad diem mortis suae XVII
Januarium anni CCCLVI, anno vitae suae centesimo sexto.
Mos est sancti Antonii die festo stabula et cicuria animalia
benedicere, quod in desertis cum feris mansuefactis convixerit;
saepe parvo sue aliisque bestiis comitatus in imaginibus
effingitur.
Petri Bruegel senioris imaginem in lignea tabula pictam
"De sancti Antonii temptationibus", Washingtoniae
servatam, hic aspicere potestis:
http://www.abcgallery.com/B/bruegel/bruegel157.html
Scripsit Herimannus Novocomensis - 13/01/2008
.
.
|
