|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
|
POLITICA
De discordiis ex certamine suffragatorio Turcorum ortis
Mevlüt Cavusoglu, minister Turcus rerum externarum, Germanos , qui prohibuissent, ne orationes in terra sua haberentur, quae ad suffragia Turcica pertinerent, cum Nazistis comparavit. Simul affirmavit, quanti momenti rationes, quas Turci cum Germanis haberent, sibi essent. Cavusoglu, cum nonnulli ministri Turci praesidii causa orationes habere vetiti essent, « non est ferendum », inquit, « populares nostros ita opprimi. Num sic amici tractantur?” Germanos consilio ac ratione populum contra conventus Turcorum incitare; ne illi Turcos de iuribus humanis et de democratia docerent. Priusquam Cavusoglu locutus est, circiter XXXL asseclae factionis AKP eo convenerunt, deinde XXL homines iis reclamantes et DCCCL custodes publici. Antea Cavusoglu, cum Hammaburgi orationem habere vellet, a magistratibus prohibitus est, ne in publicum prodiret, quod praesidium a periculo incendii non praestaretur. Interim Angela Merkel, cancellaria foederalis, cives monuit, ut aequo animo discordias illas ferrent. Prudentiae non esse Turcos propter ius dicendi minutum vituperari, si Germani ipsi idem ius minuere vellent. A.d.XVI.Kal. Mai. circiter XIV centena milia Turcorum, qui sunt in Germania, de potestate praesidis augenda suffragia ferent. Thomas de Maiziere, minister foederalis rerum internarum, dixisse fertur praesidem Erdogan homines consilio sollicitare, ut plures Turci suffragiis interessent. E quibus si Erdogan victor exisset, fore, ut legati ad conventum nationalem minus valerent. Volfgangus Schäuble, minister aerarii, praesidem Turcum monuit, ut de verbis infandis, quibus aetatem Nazistarum significasset, se excusaret. Omnium id interesse, ne res aequo magis ingravesceret. Sed tolerari non posse quemquam hoc modo de Germania loqui. Scripsit Volfgangus Austriacus - 09/03/2017 23h58 . . |
BREVES
Novissima demoscopia monstrant candidatam Democratarum ad munus praesidis USA Hilariam Clinton superare sui aemulum Republicanum Donald Trump 2-5%. - 05/11/2016 23h59
In Ungaria plebis scitum de migrantibus numerum legitimum suffragiorum non tulit, sed Minister Primarius Victorius Orban Cartam Constitutivam mutatum iri nuntiavit ne migrantes acciperentur non probante senatu. - 03/10/2016 18h35 Bratislaviae Slovacorum conveniunt duces 27 terrarum sociarum Unionis Europaeae - primum sine Britannia. Candidatus republicanorum ad munus praesidis USA Donald Trump superat in indagatione opinionum aemulatricem democratam Hilariam Clinton in tribus "civitatibus maximi momenti": Ohio (praestantia 5%), Florida (3%), Nevada (2%). - 15/09/2016 10h18
VIDE ETIAM
|
|||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||