Aquae olim deficient?

Aqua omnibus viventibus prodest, necnon hominibus qui et domestico usui et in agris colendis atque fabricationibus vel rebus fodinariis electricitateque generanda atque in circumiectis servandis ea utuntur. Aqua autem in nostro planeta abundat nam tres eius partes aqua coopertus est; maior igitur aquarum pars mari continentur.

Quod ad ipsos homines pertinet, centesima pars est nobis in usu; attamen abhinc sexaginta annos ob incolarum incrementum in dies plus aquae requiritur et hominibus et agriculturae, cui maxima aquarum pars est necesse, necnon hodiernis industriis.

Copia autem et penuria aquarum non sunt in singulis nationibus eaedem, nam aqua ex rerum natura impariter distribuitur neque imber in terram semper eodem modo cadit; inde fit ut aliquot nationes siccitate paene perenni afficiuntur. Etiam putatur mutatione climatica res in peius evenire posse atque graves certationes propter aquam inter nationes orturas esse, nam et agricolae et fabricatores sibi plus liquoris in dies postulaturi sunt.  Sed contra sunt signa temporum quae nobis spem ferunt futuri melioris. Non enim est comprobatum aquam ob mutationem climaticam deminutum iri, sed, quod est creditu facilius, pluviae diversis locis cadent, ita ut terrae quae antea fuerunt aridae postea erunt umidiores et vice versa; ex quo aliquot regiones penuriam patirentur at tota aquae vis similiter in toto planeta permanebit.

Aliqui verentur ut aquarum quanti sit copia agnosci possit et idcirco certitudine careamus de vero et securo metiendi modo; at saepe huius rei oblitum est: utilitatem technologiae ope in dies maximam ex minore aquarum copia haberi posse, adeo ut plurimis rebus usus satisfaciat.

Videamus vero aliquot nationes quae aquae vel carent vel parum habent. Israeles, quibus aqua non est satis, et plantaria guttatim irrigant et quae aqua ab exteris coluntur, ea important vel holera pomaque; itaque ipsi  minus aquae impendunt, nam, ut dicitur,  aqua virtuali utuntur, id est, aqua quae holera pomaque in exteris terris irrigavit.  Kuwaitiensis autem terra omnium aquis egenissima est, sed ex mari aqua desalinata magno pretio utuntur; inde igitur comperitur eos, qui aqua naturaliter carent vice aquae pecunia uti posse; in aquis vero regendis ducendisque opum etiam ingentium opus est ne calamitates oriantur; itaque in terra Batava quae  libra marina inferior est et quae facile inundatur, magnae moles fluctibus opponuntur et inundationes vitantur; quae quidem moles magno pretio extruuntur.

In nationibus vero evolutis perpauci aquam potu salubrem desiderant, nam omnibus sufficit; sed contra in Africa multi populi aqua salubri carent non semper propter aquae inopiam sed quod techonologia carent ut aquam ex puteis quaerant, exhauriant, purgent; qua de causa non pauci Afri morbis ex aqua contaminata afficiuntur.  Aquae igitur valde necessariae sunt sed tamen magis necessariae sunt opes ab oeconomico progressu acquisitae; scimus enim in nationibus bene moderatis id fieri; ibi imprimis agendi mercandique libertate cives fruuntur et deinde leges, si casus ferat, quae prosint omnibus et quae incrementum oeconomicum foveant, rogantur atque approbantur.

Scripsit Paulus Kangiser - - 12/02/2012 10h29

Res prosperae denuo in Europa?

De commutatione tuberosa

Axis Pacificus

De tribus paeninsulis Europaeis

De Fundo Monetali Internationali aliisque rebus oeconomicis

Euronationes

Sinae hodiernae

De negotiationibus sine ethica et fiducia

Decoctio publica in Statibus Unitis?

Quo itis euronationes?

De ciborum pretiis...

Non solum de pretio petrolei...

Bill Gates non porro omnium ditissimus

Petroleum Libyum

Societates oeconomicae poscunt, ut UE
in Hungariam inquirat...

Subnotationes fient
ante finem Septembris.