Hitchcock pellicula cinematographica "Aves" vera evasit

Urbs quaedam Hopkinsville (in Kentucky posita ) ab immenso avium agmine invasa est. Plurima milia merularum aliarumque volucrum tenebras offuderunt et civibus atque domesticis animalibus magnum terrorem affecerunt. Sol fulgebat, civis quidam dixit, cum ex improviso coelum avium nube operiri visum est. Aquae vehementibus coniectionibus et igneis crepitibus excussae, aves denique evolaverunt et cives incolumes metu liberati sunt; multi canes et feles autem pavore perculsi perierunt et urbs excrementis operta est. Scientiae periti aeris mutatione atque nimia calefactione haec fieri adfirmant; plerumque aves prope solum insidere solere cibum quaesituras; solum autem gelu cum consisteret et cibum abesset, volucres consuetudinem mutavisse.

“Aves” (graece Ornithes) comoedia V saeculo ab Aristophane scripta est, in qua duo Athenienses, cum vellent bella et concives rixosos atque iudiciorum maxime studiosos effugere, caelestem avium urbem (Nubicuculiam nomine) condere statuerunt, moenibus cinctam, ex qua incolae in homines deosque dominari possent. Veri simile est ex bello, quod Athenienses paucis ante annis contra Selinuntem et Syracusas susceperant auxilium Segestae laturi (id quod infeliciter evenit), Aristophanem materiam repetivisse. In extrema comoedia urbis incolae pacem cum deis composuerunt.

Aves et coelum libertatis et animi aequi symbola sunt; mutatis autem aeris condicionibus, homines et animalia laborare coeperunt.

Scripsit Dominicus Caveosanus - 19/02/2013 23h24

DE VIRIDI TUTELA

Elisabetha Latine sciebat

DE REBUS FUNEBRIBUS, EXSEQUIIS SEPULCRISQUE PHILIPPINORUM

NAGASAKIUM

Cur tam multos deos nihil agere et cessare patitur?

.

.

Subnotationes fient
ante finem Septembris.