|
|
|
IN ORBE
Americani reconciliationi Turcorum Israeliumque operam dant
 Americani
reconciliationi Turcorum Israeliumque operam dant
Americani, cum in oriente paci conciliandae student, Turcis
carere nolunt. Itaque Ioannes Kerry, minister Americanus rerum
externarum (quem in imagine adposita conspicis), qui
modo in Turcia commoratur, Turcos hortatus est, ut cum Israelibus
se reconciliarent. rationes, quas Turci cum Israelibus haberent,
ad securitatem et ad pacem in oriente conciliandam plurimum
valere.
Illae rationes ingravuerunt, cum Israeles ante paucos annos
impetum in navem Turcam "Mavi Marmara" appellatam
fecissent compluresque Turcos occidissent. mense Martio Israeles
sero tamen de ea re se excusaverunt. sed Ahumetus Davutoglu,
minister Turcus rerum externarum, proximo Solis die Israeles
monuit, ne diutius Palaestinenses a commeatu intercluderent:
aliter rationes , quas altera civitas cum altera haberet, in
pristinum statum redactum non iri.
Sed et Israeles et Palaestinenses dubitant, num intercessio
Turcorum quicquam proficiat. Iuval Steinitz, minister Israelianus
rerum strategicarum, dixit colloquiis directis careri non posse;
se non credere Ioannem Kerry a Turcis petiturum, ut
intercederent.
Scripsit Volfgangus Austriacus - 08/04/2013 00h12
.
.
|
|
BREVES
Turcia. Relatores Turci XXII annorum poena damnati ob involucrum diurnarii, quod "ad seditionem excitavit". - 22/05/2017 23h42
Inter 160 et 200 bellatores Curdici mortui sunt die Iovis ob ictus aeroplanorum Turcicorum in boreali parte Syriae – nuntiaverunt duces exercitus Turcici. Bellatores autem Curdici maximi socii sunt US-Americanorum contra Califatum Islamicum pugnantium. - 20/10/2016 13h34
Shimon Peres, princeps Israelianus, qui anno MCMXCIV Praemio Nobeliano pro pace exornatus fuit, agens nonagesimum quartum annum aetatis obiit. - 03/10/2016 18h31
VIDE ETIAM
|
