|
|
|
HOMINES IN CONSPECTU
Aemilius Vedova
 Aemilius Vedova
Aemili Vedova Italici pictoris primum post mortem maxima opera
Berolini exponuntur; quas admirandi usque ad diem XX mensis
Aprilis facultas datur.
Venetiis humili loco anno MCMXIX ortus, nullo picturae
magistro adiuvante ab adulescentia et delineando et pingendo se
applicavit. Romae et Florentiae ante bellum mundanum scholas
picturae frequentavit, deinde prima opera Bergomi et Mediolani
exposuit neque pingere desiit dum agminis antifascistici
particeps patriae liberandae gratia arma sumit.
Post bellum se pictorum renovatorum societatibus iunxit et
tabulas pictas apud expositiones biennio quoque et Venetiis et
Sancti Pauli in Brasilia confectas ostendit. Sexto decennio
saeculi vicesimi suum modum pingendi creavit, quem
"informem" periti appellare soliti sunt: latas nigras
lineas in amplis tabulis penicillo pingere solitus erat, quibus
alii colores passim superponebantur, ut auctoris commoti gestus
eminerent; exemplum in photographemate adposito aspici licet, (Imago
temporis - Repagula, anno MCMLI depictum). Post annum
MCMLVI, cum apud Germanos primum opera sua exposuerat,
praeclaris praemiis donari coepit. Decennio septimo saepe tabulae
ex ligno solito more exornatae invicem inclinatae et defixae
ostendebantur, quas "Plurimos" ipse appellavit, postea
et vitro et ferro ad opera conficienda Aemilius Vedova usus est.
Ad theatri scaenas exstruendas etiam laboravit, ut Lodovici Nono
celebris musici modi canerentur, plurimas demum parvas tabulas
variis rationibus incisas confecit.
Venetiis die XXV mensis Octobris anni bismillesimi sexti in
cubiculo suo mortuus est, post paucos dies quam dilecta uxor
morbo perierat.
Scripsit Herimannus Novocomensis - 03/02/2008 17h15
.
.
|
|
BREVES
SCIENTIAE
SOCIALIA
RELIGIO
SOCIALIA
RELIGIO
|
