|
|||||||||||
|
|
HISTORIA
De bello civili Americano
Omnes rerum gestarum scriptores dicunt bellum, quod 'Civile Americanum' seu de quarundam Civitatum 'secessione' appelllatur, die 12 Apr. 1861 geri coeptum esse. Diluculo enim illius diei milites quidam Civitatum meridianarum iubente Petro Beauregard, eorum duce, missilia iacere coeperunt in castra oppidi 'Samter', quod prope portum Carolopolis, quae Carolinae Meridianae urbs est, situm erat. Robertus Anderson, castrorum dux, nullum contra hostes impetum facere potuit neque eorum tormentis bellicis resistere, quod milites septentrionales ex improviso erant lacessiti atque eorum ignivomae ballistae non sine maxima difficultate in hostes verti poterant. Petro amicus erat Robertus, quoniam uterque eosdem academiae militaris, cui nomen 'West Point', magistros audiverat atque alter alterum magni faciebat. Die autem 14 Robertus deditionem hostibus fecit. Statim gaudio magno huius rei nuntius acceptus est a civibus Virginianis atque ab incolis aliarum Civitatum, quae a septentrionalibus discedere iam pridem cupiebant. Multis enim de causis illae et hae Civitates earumque incolae dissidebant. 'Unio' fuit nomen civitatum septentrionalium; 'Confoederatio' meridianarum. Illas habitabant circiter 22 miliones hominum; has tantum septem octove. Quae tamen discrepantia hominum, armorum, fabricarum, aliarumque rerum, quibus necessarie omnes exercitus egent, non impediverunt quin 'Confoederati' per quattuor annos resisterent atque non sine gloria pugnarent usque ad extremum.
Abrahamus Lincoln, praeses omnium Civitatum, secessionem omni ope compescere contendit suosque duces semper hortatus est ne, etsi e quibusdam proeliis victi evasissent, spem victoriae umquam deponerent. Optimi viri militibus imperabant septentrionalibus, sed nullus dux in toto illius belli decursu tantam adeptus est famam sicut Robertus Eduardus Lee, 'Confoederatorum' imperator vere eximius: rei militaris admodum peritus, vir erat doctus ac probus. Abrahamo Lincoln petenti ut omnium exercituum septentrionalium dux summus fieret, Lee, qui Virginianus erat, illum honorem recusavit verbis ferme his: «Neque secessionem quarundam Civitatum neque consuetudinem servos habendi probo; sed hoc gladio uti contra Patriam non possum meam». Plura de hoc bello, quod multis sub aspectibus 'modernum' dici potest atque Americanorum animos etiamnunc movet, in actis diurnis legi possunt, quae hoc tempore fere ubique in America eduntur: <http://specials.usatoday.com/civil%20war/> Scripsit Victorius Ciarrocchi |
|
|||||||||
