CINEMATA
Invictus
 Invictus
(Invictus - USA MMIX)
Pellicula filmica Clinti Eastwood ; partes maximi
momenti egerunt: Morgan Freeman (Nelson Mandela), Matthaeus Damon
(Franciscus Pienaar), Antonius Kgroge, Patricius Mofokeng,
Matthaeus Stern.
Nelson Mandela anno MCMXCV electus est praesidens Africae
Australis; qui usque ad annum MCMXC in carcere Insulae Robeniae
captivus manserat quod contra distinctionem phyleticam sine
violentia obstinate pugnavisset. Hoc primum in animo habet
Nelson, ut omnes gentes, oblitae praeteritarum dissensionum et
facinorum, in una patria reconcilientur et invicem se concives
agnoscant. Plerique tamen, tam albicolores quam nigricolores,
odii pleni tempus exspectant idoneum, ut indutiis finis imponatur
et bellum intermissum recipiatur. Follis ovalis ludus est, quo
gaudent albi Africani, cuius disciplinae eodem anno certamen
mundanum in Africa australi habebitur; nigricolores manipulum
nationalem "Dorcades" (Africe: Springboks) ut
signum oppressionis abominantur.
Inde facultatem quaerit Nelson populum tam acriter dilaceratum
iungendi: iuvenem manipuli ducem Franciscum Pienaar in palatium
praesidentialem arcessit et cum ipso amicitiam iungit, ut ex
gregis ovalifollici casibus auxilium inopinatum uni patriae
exstruendae oriatur. Francisci animus tum ad lacrimas movetur,
cum cellam visitat ubi diu Nelson captivus manserat, in Angli
poëtae carmine fortitudinem et spem requirens. Ambo consilium
tam obstinate persequuntur, ut omni populo plaudente Dorcades
sibi poculum comparent, strenuis adversariis omnibus devictis.
Inter omnes eminent histriones Morgan Freeman, mire vero
praesidenti similis, et flavus iuvenis Matthaeus Damon, Francisci
viri Nordici partes agens; sunt tamen qui pelliculam
reprehenderint, quod persona principalis exemplaris instar
difficultates ardui temporis facile superasse videatur.
Ut Latinae linguae amans, gaudeo tam populari pelliculae
filmicae titulum Latinum impositum esse, id est titulum dicti
carminis.
Scripsit Herimannus Novocomensis
|
