CINEMATA
Gran Torino(
 Gran Torino
Direxit et partem maximi momenti egit Clint Eastwood (Walt Kowalski), in scaenam reduxit Nicolaus Schenk, partes alias magni momenti egerunt Bee Vang (Thao), Ahney Her (Sue), Doua Moua (Spider seu Aranea), Brian Haley (Mitch Kowalski), Cristopher Carley (presbyter Janovich), produxerunt coniunctim Double Nickel Entertainment, Gerber Pictures, Malpaso Productions, Village Roadshow Pictures, Warner Bros., distribuit Warner Bros. (USA - MMVIII).
Waltherius Kowalski, operarius ex Polonia oriundus, aetate provectus redux ex bello Coreano, in Detroiti suburbio vivit. Cui perpauca cordi sunt: autoraeda magna et pretiosa "Gran Torino" in officinis Ford a se ipso exstructa, cervesia et assidua fumificatio. Post mulieris mortem filii nurus et nepotes inhumane eum deserunt neque amplius requirunt nisi hereditatis gratia. Sed in Waltherii vitam vicini qui ex Asia migraverant de improviso irrumpunt, postquam Thao filius adolescens autoraedae dilectae furtum imperite conatur; inde talis amicitia oritur cum iuvenis familia ex gente Austroasiana Hmong, ut senis solitudo semel desinat eiusque vita ad novum et inopinatum propositum spectet.
Mira et difficilis est actoris primi persona: quem bellum immane ferum et solitarium fecit, odio contra "lutea rostra" refertum (ita enim Asianos appellat, sicut belli tempore), nefandis culpis in proeliis perpetratis oppressum. Cum stamen tenuissimum cum invisis accolis contextum est, ipse non recedit sed mori suo obsequens iniuriis animose resistit usque ad cruorem effusum, tum vi cum violentiae inanitate agnita. De vita et de morte agit fabula, necnon de solitudine et hominum proximitate, morosum et odiosum virum demonstrans qui paulatim renovatum patris amorem, novam fraternitatem trans varietatem phyleticam discit, severitate et pertinacia militis minime amissis. Cum enim genere filius alienus esse possit, "luteum rostrum" vita oblata dignus fieri potest.
Clint Eastwood peritiam et magnitudinem suam confirmat.
| 
