CINEMATA
Michaël Clayton
 Michaël Clayton
(Michaël Clayton - Civitates Americae Unitarum
MMVII)
Pellicula filmica a Tony Gilroy directa, ab eodem
in scaenam reducta et exstructa, imagines curavit Robert Elswit,
musicam curavit James Newton Howard, produxerunt Sydney Pollack,
Jennifer Fox, Steve Samuels, Kerry Orent, partes maximi momenti
egerunt George Clooney (Michael Clayton), Sydney Pollack (Marty
Bach), Tilda Swinton (Karen Crowder), Tom Wilkinson (Arthur
Edens).
Sunt qui putent Georgium Clooney, praeclarum histrionem
Americanum, et specie et peritia inter optimos cinematon actorum
aevi nostri esse. Qui in hac pellicula filmica partes agit
Michaëlis Clayton patroni Novi Eboraci, qui scelera locupletum
clientum peritissime et rerum veritate adulterata et documentis
subiectis operire didicit. Aleae immoderate deditus, aere alieno
oppressus, nulla ratione laborem suum deserere potest. Cum autem
ab illo officina chemica defendenda est, quae plantarum pharmacum
operariis perniciosissimum vendidit ideoque ante iudices delata
est, intelligit Michaël conscientiam suam eo non pervenisse, ut
talium facinorum particeps fiat.
Paulum differt fabula ab illis iam in multis pelliculis
filmicis demonstratis: primus actor, labore sordido extenuatus,
viam redemptionis in semetipso requirit et invenit. Sed hic duo
adduntur, et Georgii Clooney ingenium et usus verorum
documentorum ab auctore ipso collectorum, quorum gratia magnae
chemicalium societates a gravissimis accusationibus indemnes
elabi potuerant: quae testimonia director Antonius Gilroy tum
obtinuit, cum pelliculam "Diaboli patronus" (The
devil's advocate) dirigente Taylor Hakford conficeret. Ita
fabula herois minime innocentis, qui se suamque dignitatem
redimit, sub animi commutationis specie ostenditur: homo tum
libertatem cum rectam conscientiam reperit neglecta scelerum
nefastorum societate.
Facies Georgii Clooney paulatim mutata, dum tituli finales
praetercurrunt, totam animi conversionem mira cum simplicitate
demonstrant.
Scripsit Herimannus Novocomensis
|
