|
|
|
ARS VIVENDI
Quomodo comedatur felicitatis gratia
 Quomodo comedatur felicitatis gratia
Possuntne cibaria hominibus felicitatem donare? Manilae, in
capite Philippinarum, est parva caupona gustatoria et
appellatione et consilio insolita: cui nomen est "Van Gogh
duos polos habet" (Van Gogh is Bipolar), illum
Batavum pictorem commemorans qui continenter cum mentis insania
certavit. Idem accidit cauponae domino Iethro Rafaėl, qui censet
aliqua alimenta convivis felicitatem donare posse eaque ratione
comparat fercula.
Ergo salmo, mel, meleagris gallopavo (*), brassica
(**), quae omnia animum levare putantur, ea ratione condiuntur ut
"diaeta bipolaris" praebeatur. Iethrus praecepta
coquinaria creavit animo revolvens diuturnas luctationes suas
contra animi maerorem: "Ego in libris - ait - indagare coepi
quomodo ex difficultatibus meis liberarer itaque detexi ciborum
varias proprietates. Nunc doctrinam meam cum aliis communicare
cupio." Non solum tamen insanis ministrat Iethrus, nam
iuvant Iethri fercula etiam animo fractos necnon illos, qui
quietem et serenitatem requirunt post cotidianam laboriosam
operam aut litem coniugalem aut iter autocineticum in
frequentissima urbe. "Homines fessi et oppressi adveniunt,
exeuntes aliter sentiunt." Nam cibaria ea ratione selecta
sunt, ut illi cerebri neurotransmissores sollicitentur, unde
animi felicitas et serenitas pendant.
Suntne Iethri opiniones scientificis fundamentis conditae,
fercula ad felicitatem comparandam coquentis? Sunt alimentorum
studiosi, qui putent re vera cibum animum afficere, quamquam
parum adhuc cognitum sit. Doctrix Alexandra Thuret, quae apud
Institutum Psychiatricum Scholae Regalis (King's College)
Londiniensis docet, confirmat pinguia "omega tria" quae
in piscium oleo inveniuntur et flavonoidia quae in vaccinio
myrtillo et in vaccinio oxycocco (°) et in obscura
socolata sunt hominum animos hilares efficere nonnullasque escas
in corpore sic agere, ut medicamenta contra animi abiectionem.
"Exempli gratia - inquit - medicamentum Prozac
neuronum creationem in cerebri hippocampo adauget, itemque
forsitan nonnulla cibaria." Neque primus est Iethrus, qui
escam et animi statum coniungit. "Olim Heston Blumenthal, -
ait Alexandra - coquus praeclarus, nos interrogavit quibus
alimentis labor deminuatur, memoria increscat." Confirmat
studiosa meleagrem gallopavonem, musas (°°) et nuces
convivis animi quietem comparare brevi saltem tempore, nam in iis
thryptophanum est, quod intra corpus in serotoninam commutatur,
oportunum neurotransmissorem. Dubitat tamen quin paucae cenae
diuturnam commutationem efficere possint, confirmat demum si quis
aeque et salubriter comedat, eum vitae sollicitudines fortius
laturum esse: moderatio optimum est, ut proverbium antiquum
commendat. "Videlicet - inquit - non iuvat cotidie socolatae
bacillum vorare!" Nam nisi ex puro theobromate (°°°)
constet, non solum flavonoidia in socolata insunt sed etiam
pinguia, quae animum frangunt et neuronum creationem deminuunt.
Difficile
est tamen studiosis de hoc argumento inquirere, nam uniuscuiusque
animus ex plurimis rebus pendet, verbi gratia ex specie loci ubi
commoreris. Caupona haec ex pictore Van Gogh nomen excipit, qui
mentis insania laborasse putatur. "Convivae eo laetiores sunt
- ait Iethrus - quo humanius tractentur. Quam ob rem de loci
amoenitate sicut de cibo solliciti sumus." Dubium non est,
quin quies ineuntis animum occupet: dum ferculorum indicem legis,
hortatur te dominus ut theae folia a te delecta in aquam calidam
infundas, ut pileo ex magna collectanea caput operias - mihi
pileus duobus avibus paleatis ornatus placuit.
Escarum
index animum hilarat, nam plerisque ferculis nomina celebrium
hominum inconstantium tribuuntur, ut Agathae Christie, Marilynae
Monroe et Winstonii Churchill; in "Potione Amatoria
Courtney", anxietati domandae apta, fructus contriti cum
mentha et melle commixta sunt; "Virginiae Woolf
Lacrimae" animi maerorem repellentes sunt ius meleagris cum
brassica viridibusque malis. Convivae felicitatis afflatu gaudere
videntur: Michaėl quidam cum sponsa post operosam septimanam,
pileis delectis capite operti, laeti sedent: "Hic comedere
mirabile est! - inquit - Hoc optimum est, nos ambos laetos
esse!" Ignorant tamen quidnam sumpserint neque illorum
interest.
Si Iethrum de re Anglice loquentem aspicere vis, hic
comprime: http://www.bbc.co.uk/news/world-asia-17381300
(*) Anglice: turkey
(**) Anglice: cabbage
(°) Anglice: blueberry, cranberry
(°°) Anglice: bananas
(°°°) Anglice: cocoa
Scriptum Catharinae McGeown die XXV mensis Martii MMXII editum
ex situ interretiali BBC News convertens
Scripsit Herimannus Novocomensis
|
|
|
