II. Iterum intravit Capharnaum post [aliquot] dies, et auditum est eum in domo esse.

² Convenerunt multi, ita ut [homines] non amplius caperentur ne ad ianuam quidem; et loquebatur eis verbum.

³ Veniunt ad eum [quidam] ferentes immobilem, qui a quattuor portabatur.

⁴ Cum non possent afferre eum illi prae turba, nudaverunt tectum, ubi erat, et illo perfosso submittunt grabatum, in quo iacebat immobilis.

⁵ Cum vidisset autem Iesus fidem illorum, dicit immobili: ‘Fili, dimittuntur peccata tua’.

⁶ Erant autem illic quidam e scribis sedentes et cogitantes in cordibus suis:

⁷ ‘Cur hic loquitur sic? Nefarium dicit! Quis potest dimittere peccata nisi solus Deus?’.

⁸ Statim cum cognovisset Iesus spiritu suo illos sic cogitare intra se, dicit eis: ‘Cur ista cogitatis in cordibus vestris?

⁹ Quid est facilius, dicere immobili: ‹Dimittuntur peccata tua›, an dicere: ‹Surge et tolle grabatum tuum et ambula›?

¹⁰ Ut autem sciatis Filium hominis habere in terra potestatem dimittendi peccata, – dicit immobili –

¹¹ Tibi dico: Surge, tolle grabatum tuum et vadito in domum tuam’.

¹² Surrexit et protinus sublato grabato abiit coram omnibus, ita ut admirarentur omnes et glorificarent Deum dicentes: ‘Numquam sic vidimus!’.

¹³ Egressus est rursum ad mare; omnisque turba veniebat ad eum, et docebat eos.

¹⁴ Praeteriens vidit Levim [filium] Alphaei sedentem ad teloneum et dicit illi: ‘Sequere me’. Surrexit et secutus est eum.

¹⁵ Factum est, cum accumberet in domo illius, ut multi publicani et peccatores simul discumberent cum Iesu et discipulis eius: erant enim multi et sequebantur eum.

¹⁶ Scribae pharisaeorum, cum vidissent eum edere cum peccatoribus et publicanis, dicebant discipulis eius: ‘Quare cum publicanis et peccatoribus edit?’.

¹⁷ Iesus hoc audito dicit illis: ‘Non necesse habent sani medicum, sed ei, qui male habent; non veni vocatum iustos, sed peccatores’.

¹⁸ Erant discipuli Ioannis et pharisaei ieiunantes. Veniunt et dicunt illi: ‘Cur discipuli Ioannis et discipuli pharisaeorum ieiunant, tui autem discipuli non ieiunant?’.

¹⁹ Dixit illis Iesus: ‘Num possunt convivae nuptiarum ieiunare, quamdiu sponsus cum illis est? Quo tempore secum habent sponsum, eo non possunt ieiunare;

²⁰ venient tamen dies, cum auferetur ab eis sponsus, et tunc ieiunabunt, illo die.

²¹ Nemo assumentum panni rudis assuit vestimento veteri; alioquin supplementum aufert aliquid ab eo, novum a vetere, et peior scissura fit.

²² Et nemo fundit vinum novum in utres veteres, alioquin vinum dirumpet utres et vinum perit et utres; sed vinum novum in utres novos [fundendum est]’.

²³ Factum est, cum ille sabbatis ambularet per sata, ut discipuli eius inciperent praegredi vellentes spicas.

²⁴ Pharisaei autem dicebant ei: ‘Ecce cur faciunt sabbatis id, quod non licet?’.

²⁵ Dicit illis: ‘Numquam legistis, quid fecerit David, cum necessitatem haberet et esuriret ipse et ei, qui cum illo erant?

²⁶ Quomodo introierit in domum Dei Abiathare pontifice et panes propositionis edit, quos non licet [cuiquam] edere nisi sacerdotibus, et dedit etiam eis, qui cum eo erant?’.

²⁷ Dicebat eis: ‘Sabbatum propter hominem factum est, et non homo propter sabbatum;

²⁸ itaque Filius hominis est dominus etiam sabbati’.

Scripsit fr.Benedictus Huculak OFM

---