Annus
2 0 1 7


SOROS REGIMEN HUNGARICUM ACERRIME VITUPERAT

Orban accusatus est quod simulatam democratiam instituisset

CEU.jpg

Aequo acrius Georgius Soros, vir locupletissimus natione Hungarica, in Victorem Orbán, primum ministrum Hungariae, invexit, cum diceret Orbánum rem publicam “mafiosam” instituisse. In tali re publica democratiam per speciem quidem valere, sed rei publicae administratores diurnarios iudicesque morem sibi gerentes ad sua ipsorum commoda et ad potestatem retinendam convertere.

Orbánum, qui gloriatus esset libertate Hungariae servata, hominem quaestuosum ac dubium se dixisse, qui id contenderet, ut quam maxima advenarum multitudo in Europam se effunderet. Quod quidem numquam in animo se habuisse.

Quod autem cives consiliis illius tam fortiter restitissent, sibi inopinato accidisse. Se gloriari Universitate Centrali Europaea ideo condita, ut libertatem academicam non solum ab regimine Hungarico, sed etiam ab ipso suo auctore defenderet.

Ex ea re se didicisse liberas civitates non solum legibus esse defendendas, sed cives ipsos eam libertatem praestare debere. Quod quidem ab universitate studiorum a se condita praestari. Ceterum se non dubitare, quin iudices postremo rem secundum se ipsum iudicaturi essent.

Praeterea maximae sibi esse admirationi, quanta virtute populus Hungaricus regimini „fraudolento ac corrupto“ resisteret.

Scripsit Volfgangus Austriacus



Retro ad:

Novissima editio
Summum paginae