De vita Aemiliae Brontė?
De
vita Aemiliae Brontė (1818-48)
Hoc die anno millesimo octingentesimo duodevicesimo nata est
in Anglia Aemilia Iana (Emily Jane) Brontė. Erat filia
cleri et soror Annae et Carlottae Brontė. Omnes tres sorores sat
clarae suo tempore scriptrices fuerunt; insuper, aderat iis
frater, nomine Branwell, qui ut pictor et poeta claruit (supra
monstratur ab eo picta imago Aemiliae). Mater Aemeliae
laboravit cancro et mortua est Aemiliā tantum annum tertium
agente, et quia pater eius erat tacitus et praeferebat solus esse
(nam multum temporis in cubiculo suo degebat), liberi eius mox
didicerunt inter se ludere. Solebant legere Shakespeare, Milton
et opera Virgilii, canere clavicordiā et ad invicem fabulas
narrare. Carlotta et Branwell finxerunt terram magicam, cui nomen
erat Angria, et deinde idem fecerunt Anna et Aemilia, quanquam
terra eorum Gondal appellata est. Quatuor pueri scripserunt
terrarum fictivarum historias. Aemilia semper poemata fabulasque
de terra Gondal scribebat, usque ad mortem suam. Scribendo
pseudonimo masculino utebatur Ellis Bell.
Opus eius omnibus notissimum est liber 'Colles ventosi' (Wuthering
Heights) inscriptus, quem in lucem edidit anno trecesimo
vitae eius. Proximo anno (1848) Aemilia mortua est.
Scripsit Howardus Sharp
|
