PUER XLIV

Fabula pelliculae dispositoris scaenarum Daniel Espinosa (Child 44) anno MCMLIII in Russia sub regimine sovietico evenit, quae, a narrationibus scriptoris Thomae Rob Smith sumpta, tamen a re vera exorta est: vixit enim nefarius sicarius in urbe Rostov, quamquam scelera annis sequentibus molitus est, qui plurimos pueros feminasque trucidavit. Leo Demidov, cuius primae partes a Thoma Hardy aguntur, tectus vigil occultae securitatis civitatis, inquirere incipit de puerorum nece, sed ei superiores ordines obstant: nam, cum in potestate communistica cives sint, caedes ab iis patrata extare non potest: “non homicidia in paradiso esse”. Quam ob rem a vetere gloria prolabitur: uxor Raisa (Noomi Rapace) falso in proditionis suspicionem venit, sed vir recusat ne eius nomen deferat. Quapropter exules in taeterrimam stationem longe ab urbe capite mittuntur. Hic tamen auxilio ducis biocolytarum loci nomine Nestorov (Gary Oldman) Leo operam dat ut occultae insidiae de tot pueris enectis in tota Russia patefiant. Sicarius demum inventus et occisus est et coniuges Moscam magna cum laude redeunt : epilogus laetus , quamquam multiplex et vix credibilis, fabulae finem facit.

Res politica nodo miscetur, sed paulatim investigatione superatur; sub pelliculae finem fabula a criminali formidulosa efficitur, sed etiam incitata et implicata videtur. Exitus magnificus non deest, sed generum dissimilitudo spectaculo nocet. Non praetereundum est quin in Russia operis filmici proiectio vetita sit, quod rei ingratae regiminis Staliniani memoriam revocaret.

CHILD 44, RES PUBLICA CECA, REGNUM UNITUM BRITANNIAE, ROMANIA, CIVITATES AMERICAE UNITAE, 2015

Dispositor scaenarum: Daniel Espinosa; scriptor scaenarum: Richardus Price; qui produxit: Ridley Scott. Histriones maximi momenti: Thomas Hardy, Noomi Rapace, Gary Oldman.

Scripsit Lydia Ariminensis