Quisnam sepultus est

… in sepulcri monumento apud Amphipolim reperto? (ii)

Ingens monumentum sepulcrale apud Amphipolin situm, in tumulo Kastae, nova magni momenti sine intermissione archaeologis effodientibus ostendit. Ante aliquot menses opus musivum in secundo cubiculo repertum est quo raptus Proserpinae imago exprimi videretur. Nam vir barbatus, id est Pluto, deus Inferorum, puellam repugnatem fulvis capillis candida veste indutam rapere reputatur. Qua re inventa, sunt qui putent hoc sepulcrum ad feminas regales pertinere, eo magis quod imago ad alteram pictam in sepulcreto Verginae mentem revocet quo loco Philippus II, pater Alexandri, sepultus est; simulque satis similis est eiusdem raptus deae in troni dorso Eurydicis, Philippi matris efficto: signa ad sententiam trahunt.

Nuperrime novus nuntius vulgatus est: fere quingenta quinquaginta ossa, quinque virorum et feminarum et etiam pueruli, modo nati, inventa sunt. Pars reliquiarum esse uni feminae sexaginta annorum videtur, Olympiadi, Alexandri matri, ut plurimi censent. Tamen post id tempus singula ossa agnosci poterunt, cum diuturna peritorum investigatione opus sit.

Peropportune in actis diurnis Novi Eboraci (New York Times) haec effossio “spectaculum verum archaeologicum” appellata est : ossa enim plerumque humi nullo ordine inventa sunt, sparsa, ut a peritis existimatur, a furibus vel quodam terrae motu, praesertim quod indicia agnoscendi prope deessent.

Scripsit Lydia Ariminensis