De comitiis in Graecia habitis

Alexis Tsipras princeps factionis Syrizae, ex litteris compendiariis sinistrarum extremarum partium nominatae, ante triduum plura suffragia quam ceteri petitores in comitiis Graecis cepit (36%), tamen non ad maximum numerum subselliorum pervenit ita ut sine sociorum auxilio rem publicam gubernare posset.

“Hodie populus Graecus novam historiae paginam scripsit. Satis est de severis consiliis oeconomicis tribus potestatibus ( FMI, BCE,UE) impositis: quod suffragia palam ac acriter ostenderunt” ait Minister Primarius designatus. Non defuit vis contraria: praeses Argentariae Foederatae Germaniae (Bundesbank) Jens Weidmann primus Graeciam monuit ut pacta oeconomica servarentur nec promitteretur quod non posset fieri aliique secuti sunt.

Insequenti die accidit quod necopinatum videbatur: Tsipras foedus iunxit cum factione dextera Anel, severitati oeconomicae et immigrantibus obstanti, ut promissa solveret. Post meridiem eiusdem diei Praeses rei publicae Carolus Papoulias ei mandavit ut novam administrationem constitueret.

Auctoritates Unionis Europaeae operam se novae administrationi adiuvandae daturas esse declarant, sed Angela Merkel Graecos hortata est ut in pacto manerent de aere alieno solvendo.

Scripsit Lydia Ariminensis