Duae puellae Italicae ...

... ab Islamicis remissae sunt.

Cum per CLXVIII dies captivae Syriacorum rebellium duae puellae Italicae mansissent, tandem ante triduum liberatae sunt: in incerto est unde Romam rediturae profectae sint, utrum a Turcia an a Libano. Cum in Syriam non longe a Beroea pervenissent, munere voluntario ut civilibus auxilio essent, exeunte mense Iulio anni praeteriti , paulo post ereptae sunt. Mense Septembri scriptum est in actis Libanensi Al-Akbar bis puellas a grege ad alium venum isse. Die 31 prioris mensis Decembris in interreti (Youtube) comparuerunt nigro velamine et veste eiusdem coloris indutae: per imagines et voces, impressas scilicet ante aliquot dies, auxilium petiverunt: “Nostram rem publicam et eius legatos oramus et obsecramus ut nos domum ante Diem Natalem reducant : in magno discrimine sumus ac fieri potest ut nos occidant.”

Lacrimis effusis parentes et familiares eas Romae in aëriportu militari complexi sunt; magno plausu nuntius liberationis in Collegio popularium legatorum acceptus est. Voluntariae multas gratias auctoritatibus Italicis egerunt et veniam de molestia allata petiverunt. Nullam vim in se a raptoribus factam esse. Interea alius nuntius actis Arabicis Al Aan vulgatus est ex qua rem publicam Italicam duodecim milliones dollariorum pro puellarum liberatione pependisse constaret. Quod statim magnam contentionem excitavit: dexterae partes acriter reprehenderunt quod pecunia puellis liberandis soluta esset. Administratio sine pretio declaravit eas remissas esse.

Magnus animus et benignitas in alios laudandi sunt, sed etiam periculose locis haud tutis virtutes illae adhibitae sunt.

Scripsit Lydia Ariminensis