NOVA TELLUS NOSTRAE SIMILIS INVENTA EST

Res magni momenti nuperrime ab astronomis inventae sunt: post miras Plutonis imagines in terram transmissas, societas NASA existimationem indiciorum “muneris Kepleri” vulgavit: telescopium in spatium siderale immissum anno MMIX novam stellam vagam nostrae terrae geminam comperit esse, ab astrorum peritis nuncupatam “Kepler 452b” (cuius supra imago artistica datur), quae in zonam habitabilem cuiusdam ordinis solaris movetur, ubi genus vitae nostrae par exstare possit vel potuerit, cum non praeter modum caleat nec nimis frigeat; paulo maior est quam noster terrarum orbis, simulque paulo vetustior, VI miliarda annorum nata. Sol paulo maior et splendidior est quam noster circum quem vertitur; intervallum idem, paulo longior annus, CCCLXXXV dierum. Cum nova tellus gemina maior aetate sit, propter hoc, quae futura sit nostri orbis terrarum sors, verisimile est intelligi posse. Unum incommodum est quod a nostra terra CXLV annos luce mensos absit.

Num sensus hominum solitudinis in immenso universo viventium desinit? Postquam ratio Copernicana pervulgata est artifices, scriptores, poetae, philosophi angoribus confecti sunt. Vertigine adhuc laborant homines nostrae aetatis cum cogitent se nihil esse inter infinitos mundos suspensos. Sed Deus fortasse non solum nos procreavit…

Scripsit Lydia Ariminensis