De armis promissis et negatis

Rumor fert currus loricatos aliaque vehicula militaria necnon tormenta armaque maiora ab Americanis missum iri in Poloniam, Romaniam, Bulgariam, fortasse Hungariam, necnon respublicas Balticas, videlicet Lituaniam, Latviam, Estoniam; nullos autem milites Americanos ductum iri in easdem regiones, quia anno 1997o Americani pacti essent cum Russis ne castra stativa ponerent in Europa orientali, ne viderentur bellum contra Russos parare. Arma ibi condita manebunt ad usum militum Americanorum et sociorum, si Russi umquam copias suas ad earum rerumpublicarum fines moverint; sed ante illud tempus a militibus indigenis, ut qui sint sociis Americanorum, custodientur. Ad arma commode in illis regionibus collocanda, ferrivia, apotheca, alia facultates aut ampliabuntur aut reficientur aut de novo adificabuntur munienturque.

Diurnariis Italis nuper rogantibus an libera respublica Europaa deberent “ursum Russicum” refrenare, Vladimirus Putin, tyrannus Russorum, respondit modo delirantem et somniantem posse mente fingere Russos subitaneum impetum facturos in liberos Europaos; quasdam gentes timore Russorum uti ad suos fines promovendos. Causam, ob quam omnes perfidiam Russorum timeant, non explicavit.

In Ucrainia, cuius partem orientalem Putin pergit negare a suis militibus oppugnari, duo milites electi, lingua Russica "Spetsnaz" apellati, et aeroplanum automaticum Russicum, quod "Forpost" vulgo dicitur, nuper capta sunt. Quemadmodum aeroplanum automatum, quo Ucrainienses carent, de Russia in Ucrainiam (ubi nulli secundum Russos sint sui milites) delapsum sit, non a Russis explicatur.

Plura huius auctoris in: http://nemo-nusquam.blogspot.com/

Scripsit Nemo Oudeis