Annus
2 0 1 4


Cur meretrices et publicani praevenient in Regnum Dei?

Cur meretrices et publicani praevenient in Regnum Dei?

Loquitur Iesus: "Quid autem vobis videtur? Homo quidam habebat duos filios. Et accedens ad primum dixit: 'Fili, vade hodie, operare in vinea'. Ille autem respondens ait: 'Nolo'; postea autem paenitentia motus abiit. Accedens autem ad alterum dixit similiter. At ille respondens ait: 'Eo, domine'; et non ivit. Quis ex duobus fecit voluntatem patris?" Dicunt: "Primus". Dicit illis Iesus: "Amen dico vobis: Publicani et meretrices praecedent vos in regnum Dei. Venit enim ad vos Ioannes in via iustitiae, et non credidistis ei; publicani autem et meretrices crediderunt ei. Vos autem videntes nec paenitentiam habuistis postea, ut crederetis ei” (Mt 21, 28-32).

Israelis praepositi et optimates repraesentantur per filium qui tantum verbis oboedivit, sed non facto; filius autem qui primo noluit sed postea ivit laboratum in vinea, peccatores paenitentes repraesentat, qui denique Iesum secuti sunt. Non semel, sed ter Iesus pharisaeorum hypocrisim vituperat, ut hodie audivimus atque duobus proximis Dominicis diebus audiemus.

Israëlitarum praepositis et optimatibus minime quidem placuit Iesu verba audivisse, nam cum publicis peccatoribus conferebantur: “Publicani et meretrices praecedent vos in regnum Dei”.

At Iesus non solum pharisaeis suo tempore loquebatur, etiam ad nos loquitur hodie. Facile nobis est dicere “Amen”, et postea a Christianorum moribus discedere. Horum verborum oportet nos memores simus: “Non omnis, qui dicit mihi: ‘Domine, Domine’, intrabit in regnum caelorum, sed qui facit voluntatem Patris mei, qui in caelis est” (Mt 7, 21).

Equidem neque filius qui dixit “non”, neque meretrices neque feneratores neque pharisaei imitandi sunt nobis. Imitemur virtutem eorum qui in fidem et paenitentiam pervenerunt. Ceteri fortasse nos praecedent in Regnum Dei, non quod meretrices aut feneratores aut pharisaei fuerint, sed quod vitam in melius et secundum Christum mutarunt, velut latro bonus, qui in cruce peccata sua agnovit.

Compendium excerptum ex Patris Iosephi I. Del Col SDB homilia hispane exarata atque die dominico XXVI per annum habita

Scripsit Paulus Kangiser



Retro ad:

Novissima editio
Summum paginae