De suffragiis Turcarum

Minister Primarius Recep Tayyp Erdogan e comitiis in singulis civitatibus nuperrime habitis quae ad administrationem pertinent, non cladem accepit, immo factio Islamica (Akp) maximam suffragiorum partem consecuta est etiamque Ancyrae, in urbe capite, Bysantii, Smyrnae: quod necopinate factum est , cum nuper princeps rei publicae accusatus esset de ambitu, de dominatu, de studio cognatos fovendi.

Erdogan, cognominatus “sultanus”, iam monuit eos qui, sententia ipsius, nationis proditores discederent. “Sunt qui iam effugere conentur, sed dubium non est quin de proditione poenas daturi sint ”, ut Ancyrae coram magno fautorum numero, ante sedem suae factionis, declaravit. Dux adversariorum partium Kemal Kilicdaroglu ante comitia “primum furem”, “dictatorem” illum appellavit apud situs interretiales (Twitter, Youtube) antequam cives aditu prohibiti essent, sed suffragiorum numerum longe inferiorem cepit. Unius dominatus etiamque exitus comitiorum magis magisque avertere Turciam ab Unione Europaea videtur.

Scripsit Lydia Ariminensis