Annus
2 0 1 4


De comitiis in Thailandia

De comitiis in Thailandia

Nuper comitia omnium civium habita sunt in Thailandia, quibus maxime partes adversantes obstiterunt. Res partim bene successit: suffragia apud CDXXXVIII sedes comitiales urbis capitis Bangkok (ex VII milibus in summa) impedita sunt et in omnibus IX provinciis regionis meridionalis; tamen non seditiones factae sunt.

Id est quod factio adversa rei publicae administrationi tendit: ut praeses Yingluck Shinawatra, soror ditissimi Thaksin, imperio orbati anno MMVI, se munere abdicet et irrita reddantur suffragia rei publicae gubernaculo faventia: nam factio praesidis plura suffragia fertur latura esse: tamen, nisi creati sint CDLXXV senatores ex summa quingentorum, ab administratione ex rei publicae constitutione nova comitia habenda esse. Adversatores praeteritis diebus ne in sedibus comitialibus petitores inscriberentur neu tabellae suffragiis ferendis multis locis traderentur impediverunt. Qua re ut omnes cives suas sententias ferrent, rector collegii comitialis nuntiavit comitia die 23 mensis Februarii perfectum iri.

Exceptis actis obstantibus, die Solis non vis cuiquam facta est; circiter ter decies centena milia custodum et militum ut seditiosi coёrcerentur instructa sunt.

Scripsit Lydia Ariminensis



Retro ad:

Novissima editio
Summum paginae