Caeruleum iasminum

BLUE JASMINE USA 2013

Dispositor scaenarum: Woody Allen; scriptor scaenarum: Woody Allen. Histriones maximi momenti: Cate Blanchette, Alec Baldwin, Sally Hawkins, Bobby Cannavale, Andrew Dice Clay.

Post pelliculas Lutetiae et Romae dicatas, quas alii aliter aestimaverunt , praeclarus dispositor scaenarum Woody Allen commodius vitae Americae excerptum in discrimine oeconomico per imagines narrat: nam fabula cum Novi Eboraci tum Sancti Francisci alternis vicibus vertitur. Formosissima artifex scaenica quae agit primas partes (Cate Blanchette) feminam nomine Iasminum interpretatur quae transit a more otioso vitaque opulenta Novi Eboraci acta cum coniuge (Alec Baldwin), ad sororis (Sally Hawkins) paupertatem Sancti Francisci commorantis. Iasminum, submissa medicamentis psychotropicis, secum saepe ipsa loquens, continuo recogitans de vita praeterita in deliciis, se accomodare ad operam nequit contemnitque sororis modestiam. Quae tamen eam hospitio domi cum filiis et novo sponso (Bobby Cannavale) accipit, quamvis maritus suus prior (Andrew Dice Clay) ab ipso viro Iasmini, ob negotium fraudolentum contractum, ad inopiam redactus sit.

Interiectis scaenis memoriae, non solum tempus quod adest sed etiam praeteritum optime ostenditur: itaque facile perspicitur coniugem quaestuosum sed fraudatorem fuisse, cum mulier conscia et socia esset; multa munera magni pretii ei donabantur a marito, sed is infidum amore aliarum correptum se praebuit. Postremo cum ea divortium facere voluit. Non hoc “caeruleum” Iasminum tulit ita cognominatum a cantu “Caerulea luna” (Blue moon), musica sui matrimonii in recessu. Ira incensa viri crimen detulit; sed ille sibi in carcere mortem conscivit; ipsius filius ob dedecus a praeclara universitate secessit, magnum odium in novercam alens. Tandem femina novum virum quaestuosum invenit sui amore captum, cui tot mendacia narrat, sed malevolentia et falsa mox deteguntur…Iasminum in ultima scaena, in scamno insidens, secum ipsa loquitur. Vita transcurrit, non conficitur.

Iudicium dispositoris scaenarum interdum misericors, modo severum, modo iocosum videtur. Pellicula variam hominum et feminarum vitam huius aetatis quadam cum veritate effingit.

Scripsit Lydia Ariminensis