Septimana Lutetiensis (VII)

... ab Herimanno eiusque filio adolescenti peracta

Mane in Platea Concordiae (Place del la Concorde) pluvia vehemens inexspectate me deprehendit: e longinquo invigilat turris Eiffeliana, comminus Hortus Fornacum (Jardin de les Tuileries) et Obeliscus Luxurensis instant. Sed iactatio Gallica ante ianuas Musaei Palmae Lusus (Musée de Jeu de Paume) evanescit, ubi plurimae magnae tabulae pictae Claudii Monet servantur, quibus nymphaeae ostenduntur: nam inire non licet propter aliam expositionem. Ergo sub arboris frondibus vix tectus acta diurna delusus legere conor, sed paulo post renuntio ob paginas humificatas. Sed quid est commoratio Parisiensis sine imbribus?

Photographema imprimo Joannae Arcensis (Jeanne d'Arc), solius mulieris monumento aureo celebratae: cuius finis longe saevior fuit, quam virorum ex lapide qui ex latere Musaei Lupariensis aspiciunt, iuxta viam Rivolianam (Rue de Rivoli). Pluviam vito in caupona parva, ubi duorum euronum pretio venit poculum chartaceum mediocris caffeae plenum, totius urbis carissimum. Post meridiem in Sacello Magno (La Grande Chapelle) sumus, auro et variis coloribus triumphanti: redundant imagines quae historias Veteris Novique Testamenti effingunt.

Vesperi instat conventus cum sodalibus Circuli Latini Lutetiensis http://www.circulus.fr/ , quibuscum cenaturi sumus. Ut primum considimus suis quisque de factis narrat: quam vitam agat, cur linguam Latinam diligat, quid agat Circulus, quid sit Ephemeris... Postea cibos delegimus et laete sumimus: carnem concisam, solana tuberosa (hic potius "mala terrestria" appellata), tomacula suilla, caseos Gallicos, funiculos ovo, adipe suillo caseoque conditos (Italice: spaghetti alla carbonara), dulce malis referto Tatinianum (Tarte Tatin), ova lactis flori permixta saccharo adusto operta (crême brûlée), vinum et cervisiam. Postea extrinsecus Abbatiam Cluniacensem admiramur, ubi muri thermarum Romanarum servantur, solum monumentum pristinae Lutetiae a Romanis conditae. In horto adposito est Lupa Capitolii aënea cum inscriptione Latina, Romae urbis donum ad perennem amicitiam comprobandam.

Iam ultima dies imminet, cervisia Belgica ante somnum est potanda!

Scripsit Herimannus Novocomensis