Septimana Lutetiensis (II)

... ab Herimanno eiusque filio adolescenti peracta

Die Solis multo mane amplissimae nundinae in lata via inveniuntur: magnae tabulae fructibus oleribus piscibus carnibus caseis floribus redundantes mediam viam occupant; non possumus facere quin verucula vitulina sumamus. In caupona quattuor viri ieientant caseo roseoque vino. Fere solae mulieres et puellae intersunt missae in templo Nostrae Dominae Spei celebratae a duobus presbyteris, altero Gallico altero nigricolore: venuste fideles concinunt, comiter invicem salutant, viva videtur communitas.

Post meridiem ad Urbiculae Hortum (Parc de la Villette) iter facimus, celeriter in emporio Iudaeo cibos emimus, in Musaeum scientiarum et artium technicarum inimus, minoris pretii si cum Londiniensi et Amstelodamensi compares: aspicimus minimum aquarium, ludos de vehiculis hodiernis, experimenta physices et matheseos, pelliculam qua exstructio spatialis DNA ostenditur. Pecunia egemus ut Geoden etiam visamus, ad dracones immanes videndos: quod nobis operae pretio dignum non videtur. Pulchra tamen est deambulatio inter aedificia saeculi primi et vicesimi usque ad Urbem Musices, miram architecturam praeterito seculo desinente exstructam. Defatigati domum redimus, die inepte peracto decepti.

In caupona Thailandica Erucae viae celeriter vespere cenamus, templum cathedrale Dominae Nostrae (Notre Dame) visuri: sumptuosum Municipium (Hôtel de Ville) praeterimus amplumque forum admiramur, quod in Italia autoraedis currentibus concederetur, deinde obstupescimus ante cathedralis templi frontem tenui lumine illustratum: profunda ostia, plurimae statuae, lata fenestra rotunda, duae altae turres mirae sunt. Interea vir magna voce de Galliae viris illustribus eloquitur, vini lagoenam manu tenens. Si aedem cathedralem circumeas, ex ordine arcus suffultorios, tubos aquiferos monstruosos, hortum Johanni XXIII pontifici dicatum, ubi aedes episcopi fuerant, conspicias usque ad Sequanam micantem, ubi lintres iuventae exsultantis plenae navigant. Brevi spatio antiqua et hodierna, conservatio et commutatio, Virgo Maria et Quasimodo (1) una vivunt.

(1) Quasimodo persona est maximi momenti in fabula Notre-Dame de Paris magni scriptoris Gallici Victorii Hugo.

Scripsit Herimannus Novocomensis