Annus
2 0 1 3


Novae dissensiones.

Novae dissensiones...

... inter Europaeos Russosque de Ucraina oriuntur.

Cum Angela Merkel, cancellaria Germaniae, Russos monuisset, ne rebus Ucrainianis se immiscerent, Russi declaraverunt ignoscendum non esse, quod Unio Europaea Ucrainianos (quorum urbs caput Kiovia in imagine ostenditur) premeret et urgeret, ut pactionem de Commeatu Expedito (Anglice: free trade) secum inirent.

Cui pactioni Russi vehementer repugnant timentes, ne, si fieret, apud Ucrainianos minus valerent. Contra Russi operam dant, ut Ucrainiani regioni Commeatus Expediti Orientali se adiungant, in qua Russia cum Ruthenia Alba et Casachstania iam est coniuncta.

Sergius Lawrow, minister Russus rerum externarum, respondit neminem nisi Ucrainianos ipsos sponte sua de ea re constituere oportere. Sed in Unione Europaea sunt, qui timeant, ne Ucrainiani, si Russis invitis pactionem cum Europaeis faciant, a gasio Russo intercludantur. Quod si fiat, iis quoque civitatibus fore detrimento, quarum gasium, quod ex Russia importetur, per Ucrainam ad eas mittatur.

Europaei proximis diebus de pactione cum Ucrainianis facienda constituent, ea scilicet condicione, ut Iulia Timoshenko, cuius valetudo ingravuit, e custodia mittatur, ut in civitate Europaea curari possit.

Scripsit Volfgangus Austriacus



Retro ad:

Novissima editio
Summum paginae