De immensa calamitate Philippina

Post transitum exitialem typhonis Haiyan nominati, in insulis Philippinis qui perierint decem milia reputantur unius urbis Tacloban capitis provinciae Leyte, in regione maxime eventu affecta. Difficillimum videtur damnorum rationem inire, quia multis locis nuntiis vulgandis instrumenta intermissa sunt. Quadragies centena milia feruntur esse qui calamitate tacti sint, quorum quadraginta centesimas partes constat pueros esse vel minores aetate, ut a Societate pro Pueritia (UNICEF) Ordinis Nationum Unitarum nuntiatum est.

Tamen, ut solet, sunt qui in suam utilitatem universa mala convertant: magnam sedem mercatoriam in urbe Tacloban latrones praedati sunt; incolae, quae inveniunt, ea corripiunt, non solum res parvi pretii sed etiam armaria frigidaria, alimenta, arbores natalicias. Sed nonnullas tabernas vigiles armati servaverunt. In aedificiis, in viis sparsis arboribus deiectis, lectis et domorum fragmentis, qui superfuerunt cum lacrimis propinquorum corpora requirunt.

Aëroportus eiusdem urbis penitus deletus est: magnum spatium lutulentum factus est. Aquarum vis evertit arbores, casas, omnia secum traxit. Apud aëroportum aqua sic alta fuisse ut palma a quodam superstite dicta est. Nunc omnia desunt, ipsa aqua bibenda, vis electrica, alimenta.

Typhon nunc   progreditur ad Mare Meridionale Sinense, sed eius vis minuta est: mane in rempublicam Vietnamitam perveniet, ubi maxima vigilantia parata est.

Scripsit Lydia Ariminensis