Magistratus Sinenses de impetu terrifico inquirunt

Cum Pequinii, in capite Siniae, autocinetum mediam in turbam incurrisset duosque ex peregrinis necavisset, nonnulli, in quos suspicio criminis cecidit, comprehensi sunt.

Magistratus, qui eam rem pro actu terrifico habent, declaraverunt consilium impetus summa cum diligentia esse captum. In vehiculo exusto ferramenta quaedam esse reperta, praeterea vexillum, cuius inscriptio ad bellum sacrum incitaret. Tres homines Lunae die vehiculum illud consilio mediam in turbam eorum direxisse apparet, qui ante palatium imperatorum versabantur. Deinde vehiculum benzini plenum, cum in ponticulum quoddam allideretur, exarsisse. Praeter eos, qui inerant, duos peregrinos vitam amisisse, XXXVIII homines esse vulneratos.

Custodes publici VIII suspiciosos exquisivisse dicuntur: ex quibus septem esse Uigures ex regione Xinjiang ortos; quae regio maxime seditiosa habetur.

Scripsit Volfgangus Austriacus