Annus
2 0 1 2


dpa, 29

d.29.m.Oct. a.2012 h.06:39

Tempestatem post hiemis ingruentiam recalescere

 

Nocte hiems vênit etiam in planities patentes.

Berolino ex urbe – Ex decenniis primum mense Octobri in Germaniâ tam vehementer ninxit, ut etiam ipsi in planitiebus patentibus oreretur tegimen nivis clausum. Fine septimanae temperaturâ raptim deminutâ quibusdam in partibus Germaniae factum est, ut nives caderent vehementes.

Christophorus Hartmann meteorologus Ministrationis Tempestatis Germanicae (DWD) ab agenturâ dpa interrogatus: "Hoc" inquit „non fit nisi tricesimo quadragesimove quôque anno". At dicitur fore, ut tempestas hac septimanâ recalescat usque ad temperaturas plus decem graduum Celsianorum supra zerotem.

Paucis diebus ante ingruentiam hiemis fine septimanae factam acciderat res contraria: - quaedam ingruentia aestatis cum temperaturis 20 (viginti) gradûs Celsianos superantibus. Multis in partibus Germaniae temperaturae valores intra septimanam deminutos esse viginti gradibus. Christophorus dixit hoc esse "valdê, valdê rarum". Hominem talem condicionem tempestatem experiri „fortasse semel aut bis in vitâ suâ". In Monte Pinifero, qui est unus ex Montibus Metalliferis Saxoniae Bohemiaeque intersitis, iam posita erat nix altitudinis 36 (triginta sex) centimetrorum. Robertus Scholz meteorologus Ministrationis Tempestatis Germanicae Lipsiensis explicavit hanc nivis altitudinem in fine septimanae fuisse in totâ Germaniâ maximam.

Multis in locis, velut in Saxoniâ et in Silvâ Nigrâ, homines ex hypogeis attulerunt sclodias et nartas. Secundum Meteomediam ministrationem tempestatis Bochumensem noctis ante diem Solem temperatura infima mensurata est in Germaniae monte altissimo, cui nomen est Zugspitze: Ibi frigus mensuratum est 16,9 (sedecim – virgula – novem) graduum Celsianorum sub zerote.

Multa autocineta nivium lubricitate delapsa sunt – saepe, quia vecta sunt nimis celeriter aut canthis aestivis usa: In oppidulo Villingen-Schwenningen Badeno-Virtembergensi autoraeda viri 18 (duodeviginti) annos nati in viâ nive obtectâ iactata collisa est cum laophoro itinerario – quo factum est, ut autoraedarius moreretur. Duobus infortuniis aliis, quae in Badenio-Virtembergâ facta sunt in viis nive obtectis, mulier 35 (triginta quinque) annos nata et 22 (viginti duos) annos natus vir autocineta gubernantes graviter violati sunt.

Multa alia infortunia iactatoria minus graviter evenerunt – plerumque factae sunt violationes leviores et detrimenta laminaria. Strata autocinetica 17 (decima septima) in meridie urbis Dresdae propter glaciem obstructa est.

Etiam commeatus ferriviarius tempestate inhibitus est: Tramen Interurbanum Citatissimum (ICE), quod vehitur inter urbes Lipsiam Monacumque, per ambages ductum est. In Thuringiâ die Saturni propter arbores eversas commeatus traminum inter Vimariam (Weimar) et Schmölln vehentium ad tempus quoddam intermissus est. Propter tempestatem etiam commeatus laophororum deminutus est. In Thuringiâ orientali compluribus in locis defecit fluentum electricum. Locutor officinae energeticae E.on Thuringiensis dixit in causâ plerumque fuisse arbores ramosque, qui in electriductûs cecidissent.

Etiam in Tsechiâ et Poloniâ nivibus atque glaciei lubricitate facta sunt impedimenta. In urbis Varsoviae circumiectis tramina per horas manserunt in nivibus haerentia. Circiter 70 000 (septuaginta milia) convictuum domesticorum per quoddam tempus expertia erant fluenti electrici, quia arboribus decidentibus electriductûs erant dissecti.

Diebus venientibus nix non iam cadet, exceptis regionibus montium mediae altitudinis, quales sunt Eiflia et Hercynia et Montes Metalliferi, ubi septimanâ ineunte fortasse singulis in regionibus cadent plumae nivales. Dorothea Paetzold meteorologa Ministrationis Tempestatis Germanicae die Solis: "At ibi quoque" inquit „non cadent magnae copiae nivium". Loco aeris polaris gelidissimi nunc fluere aerem mitiorem e directione boreo-occidentali in Germaniam.

Tempestatem fore variam, temperaturas maximas in meridie fore tres gradûs, in boreo-occidente novem. Centro pressionis maioris, quod appellaretur "Mario", primo effectum iri, ut sol splenderet; postea centro pressionis minoris, cui nomen esset „Wilma", e boreo-occidente prolapso in Germaniam allatum iri novi imbres. At tempestatem mitescere. Septimanâ procedente temperaturas maximas auctum iri usque ad valores decimo gradu superiores. Dorothea tempestatis perita: "Haud dubito" inquit „quin calores fiant duodecim vel quattuordecim graduum."

Hanc relationem d.29.m.Oct., a.2012 in Germanico periodico interretiali, c.t. est „Abendzeitung München" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/

Titulus originalis est „Wetter: Nach dem Wintereinbruch wieder wärmer".

 

 

Scripsit Nicolaus Gross



Retro ad:

Novissima editio
Summum paginae