Annus
2 0 1 2


13

d.13. m.Oct. a.2012, h.16:35

Homo Ferreus Havaianus

Iter diabolicum per paradisum faciendum

Scripsit Benjamin Knaack, in Latinum convertit Nicolaus Groß

Certamen de coronâ faciendum: Andreas Raelert triathlethes Germanus vincere vult in certamine Hominis Ferrei Havaiano. Idem postquam in cursu totius mundi durissimo bis assecutus est locum tertium semelque secundum, num nunc pariturus est victoriam?

 

Ecce natare coeperunt participes triathli totius mundi illustrissimi: In certamine Hominis Ferrei Havaiano et athletae professionales et non-professionales limites assequuntur facultatum suarum.

Tortura incohatur saltu in aquam facto: Per 3,86 km (tria – virgula – octo-sex chiliometra) triathletae natant per Sinum Kailuanum. Deinde birota ascendenda est, per 180,2 Km (centum octoginta – virgula – duo chiliometra) vehendum est a Konâ ad Hawiam et retro, ventis interdum vehementer reflantibus. Qui istaec superavit, ehem, cursum currit Marathonium, 42,195 km (quadraginta duo – virgula – unum-novem-quinque) per solitudinem desertorum, quae lavâ constant. Pedes torpent, animus ad nihil attendit nisi ad gradum proximum.

Primo in Sinu Kailuano natatur per 3,86 Km (tria – virgula – octo – sex chiliometra).

 

Quare tanta tormenta suscipis sustinenda, Andrea Raelert?

Andreas Raelert diurnariis ipsius SPIEGEL ONLINE dicit haec: "Id quod sentis lineam adventoriam transgressus, cum antea quaternis minutis chiliometrum percucurristi, et deinde 500 m (quingenta metra) percurris minutis octo, tam mirabile est, ut describi non possit. Usque id tempus nihil cogitat nisi ea quae spectant ad cursum, motor omnium maximus est animus".

Deinde athletae birotam inscendunt, per 180,2 Km a Kailua-Kona usque ad Hawiam et retro vehuntur.

Andreas Raelert, 36 (triginta sex) annos natus, longitudine corporis 1,84 m (unius – virgula - octo quattuor metrorum) longus, pondere 72 kg (septuaginta duo chiliogrammorum), hôc tempore est Germaniae triathletes optimus distantiae Hominis Ferrei. Hoc certamen Havaianum, quod fit inde ex a.1978 (anno millesimo nongentesimo duodeoctogesimo), calore saepe 40 (quattuorginta) graduum Celsianorum, est certamen Hominis Ferrei totius mundi omnium notissimum et spectatu dignissimum.

Certaminis particeps hoc anno est Andreas Raelert Germanus. Qui in certamine Hominis Ferrei Havaiani iam bis fuit loco tertio, semel secundo.

Andream bis tertium fuisse, semel secundum

Andreas Raelert ter iam particeps fuit huius certaminis Havaiensis, primo iam cursu suo praestitit rem inauditam: Quamvis tirunculus huius certaminis tertius post cursores omnium optimos Craigum Alexandrum (qui iam ter victoriam peperit) et Christianum Letonem. Andreas illo tempore diurnariis ephemeridis „Frankfurter Allgemeine Zeitung": "Vix recordor" inquit „quomodo lineam adventoriam assequerer. Si via uno metro longior fuisset, cursum non sustinuissem." Anno post Andreas metam accessit cursor secundus post virum Australianum Christophorum McCormack. Victor postea de Andreâ inferiore dixit haec: "Ille est unus e viris omnium aptissimis, qui umquam fecerunt triathlon". A.2011 (Anno bis millesimo undecimo) Germanus iterum assecutus est locum tertium.

Denique athletae percurrunt cursum Marathonium.

Hôc autem anno Andreas vult plura assequi, vult tandem victor advenire Kailua-Konam. Andreas: "Somniamus" inquit „aliquando indici eventuum infore nomen Raelertianum loco supremo". Primum etiam Michael frater Andreae quattuor annis iunior hoc fine septimanae in Havaiâ profecturus est (ab h.18.30 numerationis medio-europaeae), qui mense Iunio primum absolvit distantiam Hominis Ferrei.

Andreas de fratre suo: "Michael est admirabilis non solum propter indolem suam athleticam enorme, sed etiam propter facultatem suam patiendi enormem." Qua autem facultate Michael egebit, nam hoc certamen Havaianum est „difficultatis extremae, quantum spectat ad condiciones climaticas."

Andream esse distantiae Hominis Ferrei athletam mundi velocissimum

Ex a.1978 certamen quotannis fit.

Fervor, ventus adversus, magnus umor aeris, velocitas currendi magna – haec omnia sunt pericula athletis imminentia - eorum corporibus technisque currendi. Andreas Raelert: "Tali in certamine" inquit „omnes assequuntur limitem sui ipsius, et corpore et mente. Credo in Havaiâ neminem parere posse victoriam, nisi ei sit dies perfectus."

Ut dies sibi fiat reverâ perfectus, Andreas exercuit in Californiâ, ut calori assuefieret et minus laboraret temporis mutatione. At si accuratius rem consideras, Andreas se iam diutius praeparat, ex viginti ferê annis.

Cum eius parentes a.1992 Rostochio sedem mutarent Drageum oppidum prope Hammaburgum situm, Andreas voluntariê mansit ad litus Maris Baltici, ut apud Coetum athleticum SG Fiko Rostock tirocinium suum triathleticum perficeret. Cum multi triathletae primo unâ tantum ex tribus disciplinis instituti sunt et postea demum suscipiant triathlon discendam, Andreas omnibus tribus disciplinis perfectê est institutus. Andreas dicit: "Natando, birotando, currendo aequâ ratione deditus sum".

A.2011 Craigus Alexander triumphavit. Idem certamine finito: "Incredibile est" inquit „Exopto, ut omnis homo in mundo sentiat, quae ego expertus sim ultima milia passuum currens. Haec fuit certaminis pars finalis, de qua somniaveram".

Andreas iam adulescens successuum optimorum erat cupidissimus: necnon res optimê ei succedebant: factus est optimus triathleta iunior a.1996, secundus certaminis iuniorum mundani eiusdem anni, locum sextum assecutus est in ludis Olympicis a.2004, saepius inter decem optimos fuit in certaminibus poculi mundani. Praeterea victoriae Hominis Ferrei in Arizonâ a.2008 aut in certamine Europaeo a.2010 partae. Ex d.10. m.Iulii Andreas est Homo Ferreus totius mundi velocissimus: certamen enim distantiae longioris superavit tempore 7:41:33, i.e. septem horarum et quadraginta unius minutarum et triginta trium secundarum.

Locum secundum assecutus est Pete Jacobs, Andreas Raelert (in imagine) non potuit, quin sibi satis haberet locum tertium.

At Homo Ferreus Havaianus est certamen multo durius. Prius hôc in certamine dominabantur Americani, ex anno 2006 semper triumphaverunt Australiani. Germanorum victoriae in Havaiâ rarae fuerunt, sed fuerunt: Normann Stadler 2004 et 2006, interim Faris-al Sultan. „His mensibus annisque" Andreas inquit „nos multimodis operam dedimus." Idem nunc tandem vult coronam Kailua-Konanianam. Ab hôc fine petendo Andreas Raelert nullâ re avertetur, neque desertis lavae neque ventis reflantibus.

Hanc relationem d.13.m.Oct., a.2012 in Germanico periodico interretiali, c.t. est „spiegel online" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/ Titulus originalis est: „Ironman auf Hawai – Höllentrip im Paradies"

http://www.triathlon.de/tag/pete-jacobs

Homo Ferreus Havaianus a.2012: Inter caelum et gehennam

d.15. m.Oct. a.2012 theodiscê scripsit Nora Reim, Latinê reddidit Nicolaus Groß

Kona, d.15. m.Oct. a.2012 – Novi Homines ferrei totius mundi optimi sunt Leanda Cave et Pete Jacobs. Britanna et Australianus pugnâ durâ factâ die Saturni praeterito coronam sibi imposuerunt. Germani optimi fuerunt Sonja Tajsich quartum locum assecuta et Andreas Raelert denuo assecutus locum secundum.

Hanc relationem d.15.m.Oct., a.2012 in situ interretiali, c.t. est http://www.triathlon.de/tag/pete-jacobs editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/ Titulus originalis est: „Ironman Hawaii 2012 – Zwischen Himmel und Hölle"

 

 

 

Scripsit Nicolaus Gross



Retro ad:

Novissima editio
Summum paginae