Londinio ex urbe – En hominem ingenio parum versatili: Southampton in urbe Britanniae Iohannes Chandler parochus catholicus interdixit, ne fierent in oeco communi cursus yogae institutorii. His in oecis exerceri fidem Christianam eandemque non congruere cum hinduismo, in quo posita esset yoga; cum maximê cursûs oblati essent sub nomine „yogae spiritualis".

Cori(a) Withell moderatrix cursuum hoc parochi decretum non intellegit. Eadem oecos iam ante duos menses conduxerat necnon iam 180 (centum octoginta) Libras Britannicas solverat. Coria diurnariis ephemeridis „Telegraph" dixit se legisse meditationem a nonnullis religionibus reprobari. „At in meis cursibus numquam meditati sumus – nil faciebamus nisi exercitia. Yoga non est res religiosa: spiritualis, sed non religiosa."

At Coria frustra conata est viris ecclesiasticis persuadere, ut comprobarent yogam in oeco christiano exercendam. Eadem mulier a diurnariis ipsius „Southern Daily Echo" interrogata: "Conata sum" inquit „ecclesiasticis explicare meos curus institutorios nullo modo spectare ad religionem necnon proposui, ut illis exercitia demonstrarem". Sed etiam hoc esse renegatum. Parochus Chandler perseveravit in persuasione suâ, sed diurnariis ipsius „Telegraph" allocutus addidit verba haec: "Non dicimus yogam esse falsam aut rectam."

Locutor autem dioeceseos urbis Portsmouth declaravit fieri non posse, ut instituta catholica adhiberentur ad actiones aliarum religionum faciendas. At cum in talibus rebus nulla exstaret norma generalis, omni sacerdoti alicuius communis catholici concedi ut ipse rem decerneret.