Annus
2 0 1 2


29

d.29. m.Sept. a.2012, h.09:49

Res horribilis televisoriê emissa

Furem autocineti telecamerâ operante se ipsum sclopetando necasse

Imagines crudeles emissae sunt televisione US-Americanâ: Venatione persequendi finitâ fur autocineti Phoenicopolitanus sclopetando ipse se necavit. Statio televisoria, quae appellatur Fox News, has scaenas ex helicoptero receptas directê emiserat. Nunc praepositi stationis se excusaverunt.

Phoenicopoli (Phoenix) ex urbe – Certê istaec scaena fuit horrenda: Die Veneris Phoenicopoli in civitate foederali Arizonâ fur autocineti sclopetando ipse se interfecit. Qui vir die Veneris autocinetum ante cauponam statutum furatus studebat astyphylaces se persequentes effugere rapidissimê vehens.

Astyphylaces dixerunt, cum coepissent furem persequi, eundem compluries sclopetavisse. Per 90 (nonaginta) minutas fur et astyphylaces primo per Phoenicopolin, deinde per nonnulla chiliometra in stratâ autocineticâ 10 (decimâ) intercivitatensi (Interstate Highway 10) per desertum se proripuerunt. 100 (centum) ferê chiliometris ante limitem Californianum fur fugitivus subito autocinetum a stratâ deversum in tesquis constitit. Deinde vir ex autocineto exscendit et se interfecit ictu capitali.

Grex autem telecamerariorum stationis emissoriae Fox News ex aëre observaverat persecutionem et scaenas receptas directê per televisionem emiserant – necnon ipsum furis suicidium. Conatûs virum redanimandi facti sunt frustra, identitas eiusdem videtur adhuc ignota esse.

Postea statio emissoria Fox se excusavit, quod hanc rem televisione emiserat et declaravit oportuisse, ut scopocinema monstraretur nonnullis secundis retardatum, ut, si necesse foret, recto tempore sisteretur. Shepard Smith moderator nuntiorum: "Nos omnes" inquit „dolemus, quod hoc emissum est. Non convênit hoc emitti televisione".

Hanc relationem d.29.m.Sept., a.2012 in Germanico periodico interretiali, c.t. est „spiegel online" editam e Theodisco sermone in Latinum convertit Nicolaus Groß praeceptor Sedis interretialis domûsque editoriae, quae appellatur LEO LATINUS: http://www.leolatinus.com/ Titulus originalis est „Live im US-Sender: Autodieb erschießt sich vor laufender Kamera".

Scripsit Nicolaus Gross



Retro ad:

Novissima editio
Summum paginae