Drama insolitum experti sunt epibatae volatûs Novo Eboraco Vassintonium faciendi: MSNBC portale interretiale US-Americanum nuntiat testes oculatos referre aeroplano Americanae Societatis Aquilinae (American Eagle) aditum reliquente duas hospitissas coepisse efferatê unam alteri facere verba mala.

Mulieres rixantes cum placari non possent, aeroplaniga decrevit, ne hunc volatum unius tantum horae faceret cum hôc grege. Itaque revertit ad stabulum aeroplani. Epibatis autem post meridiem diei Mercurii exspectandum erat per quattuor horas, usque dum novae hospitissae invenirentur, quae illarum in locum supponerentur.

Epibatae hanc rem parum comprobaverunt. Marge Lopez epibata: "Incredibile fuit, perquam incomprehensibile, has mulieres professionis tam imperitas esse". Daniel Alexander autem: "Mihi videtur esse difficile creditu istas comitissimas volaticas ne per unam quidem horam potuisse cooperari".

Locutor societatis aeronauticae annuntiavit factum iri disquisitionem. Illas duas autem hospitissas nunc debere praeposito suo explicare, quare se sic gessissent. Deinde decretum iri, quid fieret propter hanc rem factam. Americana Societas Aquilina est societas filialis ipsius societatis, quae dicitur American Airlines.