Annus
2 0 1 2


ccc

De commutatione tuberosa

Grave discrimen oeconomicum Graecorum artis rebus laborantium aciem ingenii exacuit. Nam agricolae solana tuberosa directo venum dare coeperunt, ne familiis ullus interecessionis sumptus inanis amplius imponatur: quod primum in regionibus septemtrionalibus, nunc etiam Athenis fieri narratur. Singulo ita eurone tria chiliogrammata veneunt, cum in emporiis dupla pecunia stent. Tam agricolas quam emptores iuvat proxima venditio, neglectis tam magnae quam parvae commeatuum copiae mercatoribus. Suum quisque numerum saccorum solanorum tuberosorum ante tempus petit pecuniam repraesentans itaque receptionis documentum accipiens, agricolae pro merce committendum. Etiam municipia venditionibus directis intersunt.

Quam ob rem nonnullis magnis emporiis solanorum tuberosorum pretium deminuendum fuit. Verisimile est idem aliis alimentis popularibus futurum esse, sicut oryzae, farinae tritici et olivo, nam parvae sunt mercedes (quarum minimae D euronum sunt), pretia increscentia. Commutatio tuberosa incolarum videtur esse callidum artificium ad angustias intolerabiles superandas.

Scripsit Herimannus Novocomensis



Retro ad:

Novissima editio
Summum paginae