Libyci comitiis liberis intersunt

Fere tricies centena milia Libyum die Saturni suffragia tulerunt, ut senatores deligerent rei publicae regimen post diuturnam Kaddafis dictaturam creaturos. Multis in locis comitia perturbata sunt, nihilo minus multo mane multitudines patienter congregati sunt ut comitiis interessent. Auctoritates nuntiaverunt in aliquot vicis, plerumque ad orientem vergentibus, manipulos armatorum civibus comitia interdixisse: nam Cyrenaicae numerus sellarum senatoriarum minor exspectato tribuitur. Exitus post septimanam exspectatur.

Senatus regimen eliget, deinde iterum suffragia ferentur, ad patres conscriptos creandos quorum munus erit legem supremam conscribere, populo toti probandam; anno proximo novus senatus eligetur.

Tres factiones partem maximam consensuum inter se contendent: Iustitiae Factio, Aegyptiis Fratribus Muslimis proxima, Al - Watan, a milite Abdelkhadim Belhaj ducta et Foedus Liberale Mahometi Jibril, pristini regiminis temporalis ducis.

Scripsit Herimannus Novocomensis