Annus
2 0 1 2


2la010

De foedere Europaeo confirmato

Ministri Primarii XXV rerum publicarum Unionis Europaeae, exclusis regno Britannico et republica Ceca, nuper foedus fiscale (Anglice “fiscal compact”) pacti sunt ut publicus sumptus stabilis permaneat; etenim consilia non solum de parsimonia adhibenda capta sunt, sed etiam ut res oeconomica in melius mutetur.

Presidens Consilii Europaei Herman van Rompuy senatum rerum publicarum, duodecim saltem, quod decretum est, ratum habiturum esse valde confidit ut pecuniam ab Argentaria Praecipua Europaea mutuam fenore tolerabili accipere possint. Ex foedere constitutum est acceptorum et datorum parem rationem esse: licebit non legem sequi nisi perraro, sic ut expensum quotannis non maius quam dimidia centesima pars (0,5%) accepti sit. Aes alienum singulis nationibus minuendum erit ita ut lacuna nummaria non maior sit quam sexagesima pars ex centum proventus domestici (Anglice: GDP) viginti annorum spatio. Quod difficile est adsecutu, cum aes alienum Italiae duplum sit. Timor est, ne res oeconomica iacens longo tempore permaneat nimio vectigalium pondere, plurimorum coacta operis vacatione, carenti pecunia argentariis commodata, operibus plerumque imminutis, aucto petrolei pretio, civium diffidentiae habitu pervulgato.

Scripsit Lydia Ariminensis



Retro ad:

Novissima editio
Summum paginae