Annus
2 0 1 2


Regimen laborat,

Regimen laborat, populus tumultuat

Diutissime duces factionum, quae regimen Hellenicum sustinent, pactiones conficere conati sunt quibus novam versuram Graecia faciat: nam res publica CXXX milibus milionum euronum eget ut publicas impensas toleret. Parva factio dextera Laos quattuor ministros a regimine revocavit, confirmans patriam a Germania fractam esse; etiam duo ministri socialistici propter nimis severas deliberationes sellas suas deseruerunt. Nihilo minus observatores putant partem maiorem senatus Hellenici, faventibus duobus maximis factionibus, consilia ad aes alienum ingens levandum probaturam esse: ita Graeciam inter nationes eurone utentes permansuram esse.

Pleraeque societates operariorum coniunctim reclamare constituerunt contra regiminis consilia: operistitio biduo nuper coepto Athenis turbae cum astyphylacibus conflixerunt saxa et lagoenas igniferas in eos proicientes qui vaporibus lacrimigenis responderunt.

Scripsit Herimannus Novocomensis



Retro ad:

Novissima editio
Summum paginae