“Linguam latinam discite!”

“A discipulis seminariorum magis assidue linguae Latinae studendum est”: quod Pontifex Benedictus XVI expetit in epistula “Universae Ecclesiae” rectoribus seminariorum missa post triennium a “motu proprio” Papae quo sacerdotibus facultas concessa sit sacrificium eucharisticum Latine celebrandi. Nihil mirum si sacerdotes ipsi in magna difficultate sunt, cum priorem liturgiam – missale recentius anno 1962 editum est - vel linguam Latinam ignorent. Quamquam apud Facultatem Theologiae Universitatum Linguae Latinae Graecaeque studere necesse, cum non omnes antea apud lycaeum classicum vel scientificum studuerint, difficile est breviore tempore Latine discere. Sic insignis theologus, Archiepiscopus Teatis et Histonii, Bruno Forte declaravit: “Lingua Latina et Graeca cognoscendae sunt iis qui Verbo Dei servire volunt. Exempli causa hanc pulcherrimam sententiam Sancti Augustini legamus: “Nulla maior est ad amorem invitatio, quam praevenire amando”. Qui legerit opus Augustinianum linguae Latinae imperitus, numquam eius dicendi vim ac facultatem plurimi aestimabit: nec est quicquam supervacuum vel temporis acti de quo agimus, sed de augenda fide et veritate”.

A IV saeculo p.Ch. n. lingua Latina communis toti Ecclesiae est. Latine Novum Testamentum (Vulgata Sancti Hieronymi), opera patrum Ecclesiae et praeclarorum philosophorum ut Sancti Augustini et Sancti Thomae scripta sunt: nostro tempore litterae Encyclicae adhuc Latine. Potestne fieri ut sacerdotes Latine nesciant?

Scripsit Lydia Ariminensis