Annus
2 0 1 1


Bulgaria Romaniaque regioni Schengenianae non ascribentur

Bulgaria Romaniaque regioni Schengenianae non ascribentur

Germania Francogalliaque id contendunt, ut confinia inter Romaniam Bulgariamque et reliquas Unionis civitates porro custodiantur. Ex quo fit, ut Bulgaria Romaniaque mense Martio iis civitatibus, in quibus constitutiones Schengenianae valent, non ascribantur. Quod si fieret, „securitatem Unionis Europaeae in periculo fore“.

Ministri Thomas de Maiziere et Brice Hortefeux collegas suos hortati sunt, ut tunc demum de custodiis levandis constituerent, cum non iam dubium esset, quin Bulgari et Romaniani crimina ac mores corruptos aggressuri essent. Germani Francogallique imprimis de advenis affluentibus sollicitantur timentes, ne ulla custodia sublata maior eorum multitudo per Bulgariam Romaniamque in civitates occidentales perveniat.

Cum Georgus Parwanow, praeses Bulgariae, civitatem suam in hac re parum operae consumpsisse fateretur, praeses Romaniae, Traianus Basescu, de ea re indignatus „non patiemur“, inquit, „nostram auctoritatem imminui, ne ab iis quidem, qui summam in Unione Europaea potestatem habent“.

Utraque civitate anno MMVII Unioni adiuncta Commissio sexto quoque mense de statu iustitiae administrationisque referebat. Quae libello novissimo, qui mense Iulio anni superioris editus est, Bulgariam vituperavit, quod parum saepe summi rei publicae moderatores criminum morumque corruptorum accusati denique in ius vocati essent. Et vigiles publicos et iudices non esse aptos, qui maiores res inquirerent.

Gravius de Romania iudicatum est: Romaniam nolle statum rerum melius verti; ipsos summos iudices prohibere, ne quae renovatio fieret.

 

Scripsit Volfgangus Austriacus



Retro ad:

Novissima editio
Summum paginae