Annus
2 0 1 1


Syria '

Alius aliter de rebus Syriacis

Speculatores Arabici Foederis Syriam lustrare coeperunt, ut pax restituatur et iura hominum serventur: ipsi hodie confirmaverunt se nihil metu dignum ibi comperisse. Dux legatorum: "Sunt loca - inquit - ubi res male se habeant, nihil tamen terrificum, dum adsumus, conspeximus sed quietem. Vehicula armis praedita vidimus, sed nullum currum loricatum" Auctoritates Syriacae per emissiones televisificas aiunt DCCLV captivis recenter comprehensis libertatem redditam esse, quorum nemo cruorem effudisset; eadem ratione mense Novembri mille circiter captivos liberarat.

Alia referunt Ordinis Nationum Unitarum legati: plus XIV milia hominum in vinculis, quinque milia occisos esse, cotidie cruorem ab exercitu effundi, libertatem dissentiendi omnino reprimi. Haec ab oppositoribus tam in patria quam in finitimis nationibus didicerunt. Legatus Francogallicus Bernardus Valero notavit speculatores Arabicos nimis breviter in Syria commorari, ut sibi opinionem certam de rebus compararent.

Scripsit Herimannus Novocomensis



Retro ad:

Novissima editio
Summum paginae