Annus
2 0 1 1


De Coptorum exsequiis

De Coptorum exsequiis

Ante tres dies multa fidelium milia apud templum primarium Abbassiyae exsequiis Christianorum Coptorum adfuerunt qui necati sunt in urbe Al Qahira nocte prioris diei solis ante sedem telehorasis rei publicae Aegyptiae. Christiani Copti persecutione ac vi vexati superioribus mensibus publico concursu reclamaverant. Septem diebus ante caedem templum in Aegypto meridionali deletum erat, cum praefectus provinciae declaravisset aedem exstructum esse nulla data faciendi potestate. Non solum mense Maio novem Christiani interfecti erant ab extremarum partium Islamicis in ipsa urbe capite, sed apud quam etiam mense Martio per vim tredecim interierant. Iam mense Ianuario Alexandriae pro Coptorum ecclesia unus et viginti autocineto pyrobolo dolose instructo occisi erant.

Regimen militarium negat se esse auctorem necis quattuor et viginti Coptorum, sed imagines televisificae magna crudelitate seditionem compressam esse ostendunt curribus loricatis tumultuantes insequentibus. Decima pars civium Aegyptiorum profitentur se esse Christianos, sed eorum status, amoto praesidente Moubarak, in peius mutatus est: centum milia Coptorum iam peregre isse feruntur.

Scripsit Lydia Ariminensis



Retro ad:

Novissima editio
Summum paginae