Aeris alieni modus adauctus est

USAe Praesidens Baracus Obama demum subscripsit legem, qua patriae suae aeris alieni acervus adeo increscere poterit ut pensiones persolvantur. Nam plerique senatores legem maximi momenti probaverunt, cuius reiectio totius orbis res oeconomicas perturbare potuerat. Aeris alieni vis usque ad MMCCCC biliones dollariorum posthac adaugeri poterit. Diu de re egerunt praesidens eiusque factio democratica cum adversariis republicanis.

Baracus Obama dixit fora mercatoria ob dubium exitum pactionis perturbata esse, negans omnes deliberationis effectus ab illis sustinendos esse, qui graves angustias oeconomicas iam tolerassent.

Scripsit Herimannus Novocomensis