Ben Ali, qui Tunesiae diu praefuit, ante iudices deferetur

Auctoritates Tunesiae nuntiant praesidentem dignitatem mense Januario praeterito spoliatum Zine al-Abidine Ben Ali ante iudices deferendum esse, qui nunc exul in Arabia Saudiana vivit. Inter alia Ben Ali coniurationis, pharmacorum illicitorum sumptorum et venumdatorum necnon caedis accusatur: nam legati Ordinis Nationum Unitarum referunt instantibus reclamationibus ducentos circiter homines interfectos esse.

Minister iuridicis rebus addictus Lazhar Karoui Chebbi petit ab Interpolio, ut Ben Ali eiusque propinquis rei familiaris usurpatio interdicatur dum sententia dicatur.

Scripsit Herimannus Novocomensis